2025 jyly Enbek.kz elektrondy eńbek bırjasynda eń joǵary jalaqy usynylatyn jáne eń tómen aqy tólenetin mamandyqtar belgili boldy, dep habarlaıdy aqshamnews.kz
Jyl ishinde eń kóp suranysqa ıe mamandyqtar qatarynda meıirgerler, tárbıeshiler, júrgizýshiler men sanıtarlar boldy. Alaıda bul salalardaǵy usynylatyn jalaqy deńgeıi tómen bolyp qaldy. Atap aıtqanda, meıirgerlerge 143–178 myń teńge, tárbıeshilerge 139–182 myń teńge, avtokólik júrgizýshilerine 151–195 myń teńge, al sanıtarlarǵa 110–133 myń teńge aılyq usynylǵan.
Sonymen qatar jumys izdeýshilerdiń jalaqyǵa degen kútimi budan áldeqaıda joǵary ekeni baıqalady. Mysaly, býhgalterler orta eseppen 308 myń teńge, zańgerler 294 myń teńge, júrgizýshiler 250 myń teńge, al tárbıeshiler 199 myń teńge jalaqy suraǵan.
2025 jyly jumys berýshiler eń joǵary jalaqyny flottaǵy shtýrman mamandyǵyna usynǵan. Bul laýazym boıynsha aılyq 875–900 myń teńge aralyǵynda kórsetilgen. Sondaı-aq taý-ken ónerkásibinde ýchaske bastyǵynyń orynbasarlaryna 714 myń teńgeden joǵary, al burǵylaý qondyrǵylarynyń mashınısterine 700 myń teńgeden bastap jalaqy usynylǵan.
Al túıindemelerde kórsetilgen eń joǵary kútiletin aılyq pılottarda tirkelgen 1,9 mln teńge. Budan bólek, taý-ken salasyndaǵy basshylardyń orynbasarlary 1,2 mln teńge, keme kapıtandary 1,1 mln teńge jalaqy kórsetken.
Jalpy alǵanda, 2025 jyly Enbek.kz portalynda 1,3 mıllıonnan astam bos jumys orny jarıalanǵanymen, usynylatyn jalaqy men úmitkerler kútken tabys arasynda aıqyn alshaqtyq saqtalǵan.