Qyshtan qumyra jasaý – adamzat tarıhyndaǵy eń alǵashqy qoldanbaly óner túrleriniń biri ǵana emes, sonymen birge búgingi kúni psıhologıalyq jáne densaýlyqqa paıdaly terapıalyq ádis retinde de keńinen tanylǵan shyǵarmashylyq proses.
Adamzat tarıhyndaǵy alǵashqy qysh qumyralar neolıt kezeńinde paıda bolǵany belgili – Qazaqstan terıtorıasynan da osy dáýirge tıesili qysh ydystar tabylǵany arheologıalyq zertteýlerde aıtylǵan. Alǵashqy adamdar sazdy pishindep, kún sáýlesine keptirip, keıin otqa kúıdirip qysh ydystar jasaǵan. Bul ydystardy taǵam saqtaý, sý ákelý jáne sol sıaqty turmystyq maqsattarǵa qoldanǵan.
Qyshpen jumys isteý – bul qazirgi psıhologıadaǵy art-terapıa ádisteriniń bir bóligi. Art therapy (óner terapıasy) termınin alǵash 1942 jyly brıtan sýretshisi Adrıan Hıll engizgen, al keıin óner arqyly psıhologıalyq emdeý ıdeıasy damyǵan.
Qyshtan buıym jasaýdy klınıkalyq jáne shyǵarmashylyq emdeýge qoldaný HH ǵasyrdyń ortasynan beri qaraı taraǵan. Art-terapıada sazben jumys isteý adamnyń sezimine, emosıalaryn retteýge, ózin-ózi tanýǵa múmkindik beredi.
Qyshtan buıym jasaý – bul tek qolóner emes, sonymen birge kóptegen artyqshylyqtarǵa ıe terapıalyq tájirıbe:
Psıhologıalyq paıdasy
Emosıany bildirý: sózben jetkizý qıyn sezimderdi qyshpen jasap kórsetý arqyly múmkindik beredi.
Stress pen mazasyzdyqty azaıtý, sebebi qumyra jasaǵanda adam «sol sátte» bolady.
Ózin-ózi baǵalaýdy arttyrý: óz qolyńmen bir nárse jasaý adamǵa jetistik sezimin syılaıdy.
Densaýlyqqa paıdasy
Joǵary konsentrasıa: proses boıy zeıinniń shoǵyrlanýy mıǵa tynyshtyq ákeledi.
Qol men kózdiń úılesimdiligi men motorıka: sazdy ıleý men pishindeý qozǵalmaly daǵdylardy jaqsartady.
Dene men mıdyń baılanysy: fızıkalyq qozǵalys pen emosıalyq baılanysty kúsheıtedi.
Qazaqstandaǵy qumyra jasaý jáne terapıa praktıkasy
Qazirgi qoǵamda qumyra jasaý tek qoldanbaly óner retinde ǵana emes, keıbir sheberhanalarda terapıalyq baǵytta da ótkiziledi. Mysaly, keıbir sheberler balalar men erekshe qajettiligi bar adamdarmen jumys isteı otyryp, qol motorıkasy men psıhologıalyq kúıdi jaqsartýǵa nazar aýdarady.
Almaty, Astana sıaqty iri qalalarda jeke stýdıalar men shyǵarmashylyq ortalyqtarda qumyra jasaý sabaqtary, master-klasstar bar, olar kóbine 1,5–2 saǵattyq formatta uıymdastyrylady.
Almatydaǵy keıbir stýdıalar men master-klasstardyń bıylǵy baǵasy:
Bazalyq master-klass (1,5 saǵat)
5 500 – 6 000 teńge
Tolyq master-klass (kúıdirý men bezendirýdi úıretý)
8 500 – 9 000 t
Arnaıy formattar (juptardyń kezdesýi nemese korporatıv túrinde)
10 000 – 35 000 t
Bir kúndik is-sharalar
7 000 t (onlaın bılet)
Baǵalar stýdıaǵa, sabaqtyń uzaqtyǵyna jáne qoldanylatyn materıaldarǵa baılanysty ózgerýi múmkin.
Qyshtan qumyra jasaý – adamzattyń ejelgi dástúrinen bastalǵan búgingi tańda shyǵarmashylyqpen emdeý ádisi retinde tanylǵan proses. Onyń psıhologıalyq, fızıkalyq áseri bar. Qazaqstanda bul óner túri bireý úshin tabys kózi, keı adam úshin jańa hobbı men terapıalyq tájirıbe retinde belgili.