Aqshadan qysylǵanda lombardqa júgíníp, "keıín jaba salamyn" nemese "aqsha tabylsa qaıta satyp alarmyn" dep oılaıtyndar álí bar. Lombard qyzmetteríne qatysty ózgeríster engízílgeníne bírneshe jyl ótkenmen, kópshílík onyń nesıe tarıhyna qalaı áser etetínín eskere bermeıdí. Aqshamnews.kz redaktsıyasy osy máselení eske salu maqsatynda QR Qarjy naryǵyn retteu jáne damytu agenttígíne resmı saual joldady. Agenttíktíń jauabyna súıene otyryp, lombardtan qaryz alushylar úshín mańyzdy qūqyqtyq jáne qarjylyq tūstardy saraptap kórdí.
Lombard qaryzy - mıkrokredıt
2020 jyldan bastap Qazaqstandaǵy barlyq lombard mıkroqarjylyq ūıymdar dep tanylyp, Qarjy naryǵyn retteu jáne damytu agenttígíníń baqylauyna alyndy. Osy kezden bastap lombardtar jeke tūlǵalarǵa beretín qaryzdar mıkrokredıt retínde qarastyrylady.
Zańnamaǵa sáıkes, lombardtar berílgen qaryzdar, olardy óteu tártíbí jáne merzímí ótken bereshekter turaly aqparatty kredıttík byurolarǵa míndettí túrde ūsynuǵa tıís. Būl derekter qaryz alushynyń nesıe tarıhynyń bír bólígíne aınalyp, sońǵy aqparat túsken kúnnen bastap kemínde bes jyl boıy saqtalady.
Eger lombardqa ótkízílgen altyn būıym belgílengen merzímde qaıta alynbasa, ol ótelmegen qaryz retínde esepke alynady.
Lombard qaryzy ıpoteka nemese nesıe aluǵa kedergí bola ma?
Lombard aldyndaǵy qaryz azamattyń ıpotekalyq nemese ózge de banktík nesıe aluyna tíkeleı tyıym salmaıdy. Alaıda bank nesıe beru turaly sheshím qabyldaǵan kezde qaryz alushynyń qarjylyq jaǵdaıyn jan-jaqty baǵalaıdy.
Atap aıtqanda, bank:
- qaryz alushynyń tabysy men shyǵystaryn;
- jalpy qaryzdyq júktemesín;
- nesıe tarıhyndaǵy barlyq míndettemení;
- tólem tártíbín eskeredí.
Eger lombardtaǵy qaryz uaqytyly ótelíp otyrsa jáne merzímí ótken bereshegí bolmasa, nesıe maqūldau yqtımaldyǵy saqtalady. Al keshíktírílgen nemese ótelmegen qaryzdar táuekel faktory retínde baǵalanady.
Lombardqa jıí júgínu bank sheshímíne qalaı áser etedí?
Lombardqa altyn būıymdardy nemese ózge de baǵaly zattardy jıí qoyu keıbír jaǵdaılarda qarjylyq tūraqsyzdyqtyń janama belgísí retínde qarastyryluy múmkín. Nesıe aluǵa ótínísh bergen kezde bank qaryz alushynyń tólem qabíletín baǵalap, onyń kírís kózderíníń tūraqtylyǵyna da nazar audarady.
Lombard qyzmetterín jıí paıdalanu bank aldynda qaryz alushynyń uaqytsha qarjylyq qıyndyqtarǵa tap bolatynyn kórsetuí múmkín. Degenmen árbír qarjy ūıymynda nesıe beru turaly sheshím qabyldaudyń ózíndík íshkí júıesí bar, jáne barlyq faktorlar keshendí túrde qarastyrylady.
Bankter lombard qaryzyn qalaı esepteıdí?
Bankter qaryz alushynyń jalpy qaryzdyq júktemesín (JQJ) esepteu kezínde lombard qaryzyn basqa mıkrokredıttermen teń negízde eskeredí.
Eger qaryz alushynyń tabysyna shaqqandaǵy aı saıynǵy tólem mólsherí joǵary bolsa nemese bírneshe mıkrokredıt qatar júrse, bank nesıe somasyn azaıtuy nemese nesıe beruden bas tartuy múmkín.
Qaryz uaqytynda ótelse, nesıe tarıhyna qalaı áser etedí?
Lombard qaryzy uaqtyly jáne tolyq ótelgen jaǵdaıda, ol nesıe tarıhynda oń aqparat retínde kórsetíledí. Būl qaryz alushynyń tólem tártíbín saqtaıtynyn dáleldeıdí.
Negízgí táuekel - qaryzdy óteu merzímín ótkízíp alu.
Qaryz ótelmeı, kepílge qoıylǵan múlík satylsa ne bolady?
Eger qaryzdy óteu merzímí ótíp ketse, lombard kepílge qoıylǵan múlíktí kemínde 30 kún saqtauǵa míndettí. Osy merzímnen keıín ony satuǵa qūqyly.
Kepíldegí múlík satylǵan jaǵdaıda:
- lombardpen jasalǵan shart toqtatylady;
- qaryz alushynyń míndettemelerí joıylady.
Alaıda qaryzdy óteu merzímín ótkízíp alǵan barlyq jaǵdaılar nesıe tarıhynda saqtalady. Yaǵnı, bereshek múlík esebínen jabylǵanymen, keshíktíru faktísí esepte kórínís tabady.
Nesıe tarıhyndaǵy aqparatty qalaı túzetuge bolady?
Eger qaryz alushy óz nesıe tarıhyndaǵy málímettermen kelíspese, ol kredıttík byuroǵa nemese aqparat berushí ūıymǵa (lombardqa) jazbasha ótínísh beruge qūqyly.
Ótínísh 15 jūmys kúní íshínde qaralady. Eger qate rastalsa, aqparat 10 jūmys kúní íshínde túzetíledí, al qaryz alushyǵa jańartylǵan nesıe esebí ūsynylady.
Ipoteka aludy josparlaǵan azamattarǵa ūsynystar
QR Qarjy naryǵyn retteu jáne damytu agenttígí azamattarǵa:
- kredıtorlar aldyndaǵy barlyq míndettemelerdí shartqa sáıkes jáne uaqytyly oryndaudy;
- qarjylyq jaǵdaıdy jańa qaryzdarmen kúrdelendírmeudí;
- uaqytsha qıyndyqtar tuyndaǵan jaǵdaıda kredıtorlarmen belsendí dıalog júrgízudí;
- ıpoteka nemese írí nesıe aluǵa ótínísh bermes būryn lombard qaryzdaryn tolyq jabudy ūsynady.
Lombard - jedel qarjylyq kómek kórsetetín qūral. Alaıda ol azamattyń nesıe tarıhyna jáne bolashaqtaǵy qarjylyq múmkíndíkteríne áser etuí múmkín. Sondyqtan lombardtan qaryz almas būryn onyń qūqyqtyq saldaryn jáne ūzaq merzímdí yqpalyn (áserín) eskergen jón.
Qarjy máselesínde uaqytsha sheshímder bar, al nesıe tarıhy - ūzaq jyldarǵa qalatyn qarjylyq sením kórsetkíshí.