Premer-mınıstrdiń orynbasary – Jasandy ıntellekt jáne sıfrlyq damý mınıstri Jaslan Mádıev memlekettik sektorda jasandy ıntellektini engizý boıynsha álemdegi úzdik 100 kóshbasshynyń qataryna kirdi, dep habarlaıdy aqshamnews.kz
Ol bedeldi Government AI 100 (2026) halyqaralyq reıtıńine AI adoption & implementation (JI-di qabyldaý jáne engizý) sanaty boıynsha endi.
Atalǵan reıtıń jyl saıyn Apolitical halyqaralyq platformasymen jasaqtalady. Tizimge memlekettik basqarýda jasandy ıntellektini strategıa, retteý jáne praktıkalyq qoldaný deńgeıinde damytyp júrgen álemniń jetekshi tulǵalary engiziledi.
Halyqaralyq sarapshylar Jaslan Mádıevtiń memlekettik basqarý júıesine JI sheshimderin naqty engizip, olardy aýqymdy túrde qoldanýǵa jol ashqan eńbegin joǵary baǵalaǵan. Bul jetistik Qazaqstannyń derekterge negizdelgen basqarý modeline kóshýi jáne jasandy ıntellektini negizgi memlekettik prosesterge júıeli túrde ıntegrasıalaý saıasatynyń nátıjesi retinde atalyp otyr.
Aıta keteıik, 2026 jyl Qazaqstanda "Sıfrlandyrý jáne jasandy ıntellekt jyly" dep jarıalanǵan. Osy kezeńde elde GovTech sheshimderiniń arhıtektýrasyn qalyptastyrý, ulttyq jasandy ıntellekt platformalaryn damytý jáne kadrlyq áleýetti kúsheıtý baǵytynda keshendi jumystar júrgizilýde.
Government AI 100 reıtıńi aıasynda Qazaqstannyń kelesi baǵyttardaǵy úlesi erekshe ataldy:
memlekettik basqarýda JI-di tájirıbelik turǵyda engizý;
jasandy ıntellektini paıdalanýdyń normatıvtik-quqyqtyq bazasyn qalyptastyrý;
memlekettik qyzmetshilerdiń sıfrlyq jáne basqarýshylyq quzyretterin damytý;
JI-di etıkalyq, qaýipsiz jáne jaýapty qoldaný qaǵıdattaryn ornyqtyrý.
Táýelsiz sarapshylar baǵalaýyna negizdelgen bul reıtıńke qazaqstandyq ókildiń enýi elimizdiń jahandyq jasandy ıntellekt jáne sıfrlyq basqarý salasyndaǵy róliniń artyp kele jatqanyn kórsetedi.