Qorǵanys mınıstriniń birinshi orynbasary Asqar Mustabekov 2026 jylǵy 29 qańtarda Senattaǵy brıfıńte kelisim-shart boıynsha áskerge shaqyrýdaǵy jańalyqtar týraly málimdedi, dep habarlaıdy aqshamnews.kz
Onyń aıtýynsha, áskerı kafedrany bitirgennen keıin elimizde mobılızasıalyq rezervti qurý aıasynda keıbir tapshylyqqa ushyraǵan mamandyqtar boıynsha tulǵalar áskerge shaqyrylýy múmkin.
"Bizdiń elde tapshylyqqa ushyraǵan mamandyqtar óte kóp. Bul medısınalyq mamandar, psıhologtar jáne basqa da tar baǵyttalǵan mamandyqtar", – dedi Mustabekov.
Vıse-mınıstrdiń sózinshe, osyndaı mamandyq ıeleri mindetti áskerge shaqyrýǵa emes, tek kelisim-shart boıynsha qyzmetke jiberiledi.
"Kelgen kezde ol kelisim-shartqa otyrady. Qyzmet uzaqtyǵy kelisim-shartqa baılanysty bolady. Eger 5 nemese 10 jylǵa kelisim-shart jasasa, sonsha qyzmet etedi. Qazirgi ýaqytta mindetti shaqyrý qarastyrylmaǵan", – dedi Mustabekov.
Esterińizge salsaq, buǵan deıin Qorǵanys mınıstrligi áskerılerdiń qaza bolýy saldarynan shuǵyl sharalar qabyldaǵanyn habarlaǵan bolatyn.