Sıfrlyq tólqujat pen Volu-Coins: Almatyda eriktiliktiń geımıfıkasıalanǵan modeli engiziledi

Almatyda 2026 jyly geımıfıkasıa elementteri bar erikti retinde qatysýdyń sıfrlyq modelin engizý josparlanyp otyr. Bul týraly Almaty qalalyq Óńirlik komýnıkasıalar qyzmetinde ótken brıfıńte Qalalyq jastar saıasaty basqarmasy basshysy Azız Kajdanbek málimdedi.

Onyń aıtýynsha, turaqty eriktiler ınfraqurylymyn damytýǵa jáne zamanaýı sıfrlyq sheshimderdi engizýge erekshe nazar aýdarylady. Búginde Almatydaǵy eriktilerdiń front keńsesi 58 myńnan astam eriktini biriktiredi. Tek 2025 jyldyń ózinde olar qaladaǵy 2 myńnan asa is-sharaǵa qoldaý kórsetken. Bul eriktiler qozǵalysynyń júıeliligi men aýqymyn aıqyn ańǵartady.

«Bizdiń basty mindetimiz – eriktilik jastar úshin bir rettik aksıa emes, jeke damýdyń jáne qala ómirine aralasýdyń túsinikti ári ashyq jolyna aınalýyna jaǵdaı jasaý», – dedi Azız Kajdanbek.

Sıfrlyq model aıasynda árbir qatysýshyǵa onyń mártebesi, jeke statısıkasy, mısıalary men jetistikteri kórinis tabatyn sıfrlyq eriktilik tólqujaty jasalady. Sondaı-aq, Volu-Coins atty ishki yntalandyrý valútasyn engizý kózdelgen. Ony jabyq is-sharalarǵa qatysýǵa, brendtik ónimder alýǵa jáne qoǵam kóshbasshylarymen kezdesýlerge paıdalanýǵa bolady.

Úzdik eriktiler qalalyq reıtıńke engizilip, strategıalyq jobalarǵa tartylady. Arnaıy vızýaldy sıfrlyq karta eriktilik joldy jáne qalalyq bastamalarǵa qatysý deńgeıin kórneki túrde baqylaýǵa múmkindik beredi.

Buǵan qosa, 2026 jyly Almatyda «Almaty Volunteers 2026» lendıngin iske qosý, jastar alańdarynda ekosuryptaý pýnktterin ashý, Eriktiler akademıasynyń jumysy, jazǵy kóshbasshylyq lagerin ótkizý, sondaı-aq Volunteer Skills Map sıfrlyq kartasyn engizý josparlanǵan. Sonymen qatar eriktilik ortalyqtardyń jumysyn birizdendiretin ortaq standarttar, verıfıkasıa tetikteri jáne eriktiler mártebesin damytýǵa arnalǵan usynystar ázirlenip jatyr.