19 aqpanda qasıetti Ramazan aıy bastalady. Osy kúni musylmandar oraza ustaýǵa kirisip, ol 20 naýryzǵa deıin jalǵasyp, Oraza aıt merekesimen támamdalady. Iman keltirgen jandar úshin bul kezeń tamaqtaný tártibiniń ózgerýi ǵana emes, ishki tártipke kelý, ómirdiń úırenshikti yrǵaǵyn qaıta baǵalaý jáne kúndelikti kúıbeńde keıinge ysyryla beretin rýhanı qundylyqtarǵa qaıta oralý ýaqyty.
Ramazan toqtaý aıy. Bul tánniń emes, eń aldymen oı men nıettiń toqtaýy. Adam osy kezeńde kúndelikti ádettiń avtomatızminen shyǵyp, ózine muqıat úńile bastaıdy: sózderine, is-áreketine, nıetine, júregin ne nárse qozǵap turǵanyna nazar aýdarady.
Sondyqtanda Ramazanda adamgershilik minez-qulyqtyń máni aıryqsha artady. Oraza - tańnan keshke deıin iship-jeýden tyıylý ǵana emes. Bul óz-ózińmen jumys, ımandy kúsheıtý, sabyr men ózin-ózi baqylaýdy damytý, dórekilikten, ótirikten, ósek pen bos sózden aýlaq bolý. Mańyzdysy - adamnyń ne jemegeni emes, ne aıtpaǵany, ne oılamaǵany, júregine neni jolatpaǵany.
Bul aıda artyq tutyný týraly da oılaný oryndy - tek taǵamdy emes, emosıany, aqparatty, kórsetpeli menmendikti de shekteý qajet. Ramazan óziniń máni jaǵynan ishki tynyshtyq, jınaqylyq pen ólshem aıy. Ol adamdy qajettiden artyq almaýǵa, barǵa shúkir etýge úıretedi.
Qazaqstandyq otbasylar úshin Ramazan dástúrli túrde áleýmettik baılanystardy nyǵaıtatyn kezeńge aınalady. Birge aýyzashar jasaý, jaqyndarǵa kóńil bólý, dostardy, kórshilerdi, áriptesterdi úıge shaqyrý - oraza ustamasa da, adamǵa degen qurmettiń kórinisi. Aýyzashardyń qundylyǵy dastarhannyń moldyǵynda nemese jumsalǵan qarjyda emes, ortaq as pen qasıetti aıdyń berekesin bólise alýynda.
Ókinishke qaraı, keıde biz osy maǵynany joǵaltyp alamyz. Áleýmettik jelilerde jyl saıyn aýyzashar dastarhandarynyń sán-saltanatymen jarysqan beıneler kóbeıip keledi. Aýyzashardy jarysqa, tipti básekege aınaldyrý - onyń rýhyna qaıshy. Bir jaǵynan, mol qarajat jumsap, ekinshi jaǵynan turmysyna shaǵymdanatyn jandardy kórý de oılandyrady.
Negizinde aýyzashar - toı emes. Ol - tynysh ári tereń máni bar rásim. Munda qarapaıymdylyq, shynaıylyq jáne duǵa men oıǵa kóbirek ýaqyt bólý mańyzdy. Kórsetpeli molshylyq orazanyń negizgi ıdeıasyna - sabyr men shekteýge - qaıshy keledi.
Ramazan syrtqy áreketter aıy emes, ishki ózgeris aıy. Onyń basty máni de osynda: osy aı aıaqtalǵan soń adam az da bolsa ózgerip, sabyrlyraq, adamdarǵa muqıat, óz-ózine adalyraq bolyp shyqsa - orazanyń jemisi sol. Al eger ondaı ózgeris bolmasa, onda eń mańyzdy nárse nazardan tys qalǵany.