Mádenıet jáne aqparat mınıstrligi mádenı uıymdardyń balet ártisterine arnaıy aılyq tólemderdi taǵaıyndaý erejesine ózgerister engizýge daıyndyq júrgizip jatyr, dep habarlaıdy aqshamnews.kz
Jańa erejege sáıkes, tólemder ádil jáne aıqyn esepteletin bolady: ártisterge sońǵy úsh jyldaǵy ortasha aılyq jalaqynyń 60%-y kóleminde tólem taǵaıyndalady. Bul úshin ártisterdiń tabystary qujattarmen rastalýy tıis, osylaısha negizsiz artyq tólem jasalýy aldyn alynady.
Esepteýdi arnaıy komısıa júrgizedi. Komısıa quramyna ýákiletti jáne jergilikti atqarýshy organdardyń bólim basshylary, balet óneri qaıratkerleri, sonymen qatar ekonomıka, qarjy, kadr salasynyń mamandary men basqa da sarapshylar kiredi.
Mınıstrliktiń habarlaýynsha, qujatty qabyldaý ártisterdiń qujattaryn obektıvti qaraýǵa, sheshimderdiń quqyqtyq jáne qarjylyq turǵydan durys bolýyna, sondaı-aq kásibı qyzmetin saraptamalyq baǵalaýǵa múmkindik beredi. Bul sýbektıvti kózqaras pen búdjettik qarajatty maqsatsyz jumsaýdy boldyrmaıdy.
Joba "Ashyq normatıvtik quqyqtyq aktiler" saıtynda 2026 jylǵy 12 aqpanǵa deıin qoǵamdyq talqylaýǵa usynyldy.