Almatyda Mınımaldy ınvazıvtí kardıohırurgıya (MICS) ortalyǵy men Aorta patologıyasy ortalyǵy ashyldy

Almaty Qalalyq kardıologıyalyq ortalyǵynyń kardıohırurgıya bólímshesí bazasynda shūǵyl jáne josparly patsıentterge kómek kórsetetín Mınımaldy ınvazıvtí kardıohırurgıya (MICS) ortalyǵy men Aorta patologıyasy ortalyǵy ashyldy. Būl turaly ortalyq dırektory Ermaǵambet Quatbaev Almaty qalasy Qoǵamdyq densaulyq saqtau basqarmasynyń (QDSB) basshysy Marat Pashımovpen ótken eseptík kezdesude málímdedí.

Mınımaldy ınvazıvtí kardıohırurgıyanyń basty erekshelígí - keude quysyna jasalatyn dástúrlí kólemdí tílíkten bas tartu. Ota keude súıegín kespeı, búıír jaqtan shaǵyn tílík arqyly jasalady. Būl hırurgıyalyq jaraqatty azaıtyp, asqynu qaupín tómendetedí árí patsıentterdíń tezírek sauyǵyp ketuíne múmkíndík beredí. Qazír kardıohırurgıyalyq otanyń jalpy kólemíníń shamamen 4 paıyzy osyndaı ota.

MICS baǵytyn damytu zamanauı otanyń úlesín arttyryp, patsıentterdíń ozyq tehnologıyaǵa qoljetímdígín keńeıtuge, sondaı-aq, ásírese eńbekke qabílettí jastaǵy adamdar úshín statsıonarda jatu jáne ońaltu merzímín qysqartuǵa múmkíndík beredí.

Jūmystyń jeke bír baǵyty - Aorta patologıyasy ortalyǵy. Aortanyń patologıyasy kúrdelílíktíń 7-sanatyna jatady jáne kardıohırurgıyadaǵy eń auyr, ómírge asa qauíptí jaǵdaıdyń bírí sanalady. Mūndaı kezde ár mınut qymbat, al dıagnoz qoyu men sheshím qabyldau jyldamdyǵy aurudyń nátıjesíne tíkeleı áser etedí. Statıstıkaǵa sáıkes, aortanyń jedel patologıyasy bar árbír úshínshí nauqas kóz jūmady, al patsıentterdíń 70%-ǵa juyǵy - jas árí eńbekke qabílettí adamdar.

Mamandandyrylǵan ortalyqtyń qūryluy qaladaǵy medıtsınalyq ūıymdarmen ózara ís-qımyldyń bíryńǵaı algorıtmín engízuge múmkíndík beredí. Būl alǵashqy júgínuden bastap joǵary tehnologıyalyq medıtsınalyq kómek kórsetílgenge deıíngí uaqytty edáuír qysqartady. Osyndaı algorıtmdí jetíldíru kóptegen adamnyń ómírín saqtap, asa auyr júrek-qantamyr auruy kezíndegí ómír súru kórsetkíshín arttyruǵa jol ashady.

Jyl saıyn Almaty Qalalyq kardıologıyalyq ortalyǵynda 38 myńnan astam patsıent medıtsınalyq kómek alady, sonyń íshínde 11 myńǵa juyǵy statsıonarlyq em qabyldaıdy.

Ótken jyly ortalyqta qalalyq deńgeıde būryn qoljetímsíz bolǵan joǵary tehnologıyalyq emdeu ádísterí engízíldí. Atap aıtqanda, LVAD ımplantatsıyasy, júrek transplantatsıyasy, Beating Heart ádísímen qaqpaqshalardy plastıkalau jáne ıntraotalyq krıoablyatsıya qoldana otyryp qaqpaqshalardy protezdeu júzege asyryldy.

Interventsıyalyq kardıologıya qarqyndy damyp keledí: MitraClip, qantamyríshílík lıtotrıpsıya (IVL), endomıokardtyq bıopsıya jáne qantamyríshílík ultradybystyq zertteu (IVUS) engízíldí. Al arıtmologıya qyzmetínde kúrdelí otalar ıgeríldí, sonyń íshínde ıshemıyalyq qarynshalyq tahıkardıyaǵa radıojıílíktí ablatsıya (Almatyda alǵash ret) jáne sol jaq júreksheníń qūlaqshasyna okklyuder ımplantatsıyalau bar.

Byltyr qarasha aıynan bastap ortalyqta nauqasqa baǵdarlanǵan tásíl engízíldí: auruhanadan shyqqannan keıín barlyq patsıenttíń jaǵdaıyn, taǵaıyndalǵan emge beıíldígín baqylau jáne asqynudy erte anyqtau maqsatynda «Qamqorlyq bólímí» qyzmetkerlerí baqylau telefon qońyrauyn júzege asyrady.

Joǵary tehnologıyalyq ota kólemín kezeń-kezeńímen keńeıtu ortalyqtyń kúrdelí júrek-qantamyr aurularyn dıagnostıkalau jáne emdeu múmkíndígín edáuír arttyryp otyr.

Ortalyqtyń aldaǵy josparynda gıbrıdtí robottandyrylǵan angıografıyalyq arıtmologıyalyq qondyrǵyny engízu jáne paıdalanu tūr. Būl otanyń dáldígín arttyryp, júrek yrǵaǵynyń kúrdelí būzylysyn emdeu múmkíndígín keńeıtíp, patsıentterdíń qauípsízdígín kúsheıtedí.

Kezdesu qorytyndysy boıynsha Almaty qalasy Qoǵamdyq densaulyq saqtau basqarmasynyń basshysy Marat Pashımov būl nátıjemen shektelmeı, ınnovatsıyalyq medıtsınalyq tehnologıyany júıelí túrde engízudí, joǵary tehnologıyalyq kómektíń ayasyn keńeıtíp, onyń halyq úshín qoljetímdígn arttyrudy tapsyrdy.