Senat depýtattary kúzet qyzmeti, turǵyn úı qatynastary jáne quqyq qorǵaý qyzmeti máseleleri boıynsha zańnamaǵa engizilgen túzetýlerdi maquldady, dep habarlaıdy aqshamnews.kz
Senator Janna Asanovanyń aıtýynsha, bul zań kúzet qyzmeti salasyndaǵy memlekettik baqylaý tártibin jetildirý, qarý ıelerine jáne kúzet qyzmetin júzege asyratyn uıymdarǵa qoıylatyn talaptardy kúsheıtý, sondaı-aq turǵyn úımen qamtamasyz etý jáne turǵyn úı tólemderin júzege asyrý tártibin jetildirý maqsatynda ázirlengen.
"2026 jylǵy 1 qańtardaǵy jaǵdaı boıynsha ishki ister organdarynda 4 463 jekemenshik kúzet uıymy tirkelgen. Kúzetshilerdiń jalpy sany 97 myń adamnan asady. Ózderińizge belgili, jekemenshik kúzet uıymdary polısıa qyzmetkerlerimen qatar kúzetiletin nysandardyń qaýipsizdigin qamtamasyz etip, qoǵamdyq tártipti saqtaýǵa úles qosady. Osyǵan baılanysty zańmen usynylyp otyrǵan túzetýler mundaı uıymdardyń jaýapkershiligin kúsheıtedi, óıtkeni olardyń qyzmeti jeke jáne zańdy tulǵalardyń ómiri men densaýlyǵyn, sondaı-aq múlkin qylmystyq jáne ózge de zańsyz áreketterden qorǵaýmen tikeleı baılanysty", – dedi Janna Asanova.
Zań aıasynda mynadaı sharalar engiziledi:
qarýy bar zańdy tulǵalar úshin qyzmeti ýaqytsha toqtatylǵan jaǵdaıda qarý men oq-dárilerdi ishki ister organdaryna saqtaýǵa tapsyrý mindeti;
jekemenshik kúzet uıymdarynyń qyzmetin toqtatý, aıaqtaý nemese qaıta bastaý, sondaı-aq tirkelgen jerinen tys aýmaqta kúzet qyzmetin kórsetý jaǵdaılary týraly polısıanyń aýmaqtyq bólimshelerin habardar etý mindeti.
Senatordyń aıtýynsha, bul mańyzdy túzetýler ýákiletti organdarǵa jekemenshik kúzet uıymdaryna qatysty túrli oqıǵalarǵa jedel áreket etýge múmkindik beredi, óıtkeni kóptegen jaǵdaıda kúzet uıymynyń basqa óńirde júrgeni tek belgili bir oqıǵa oryn alǵannan keıin ǵana anyqtalady.
"Zańdaǵy jańa norma – kúzet qyzmeti sýbektileriniń ýákiletti organǵa óz qyzmeti týraly esep berý mindetin engizý. Bul memlekettik baqylaýdy tıimdi júzege asyrýǵa yqpal etedi, sebebi qazirgi tańda eseptilik usyný tártibi zańmen naqty rettelmegen. Sonymen qatar, qarý aınalymy salasyndaǵy memlekettik baqylaýdy kúsheıtý maqsatynda azamattyq jáne qyzmettik qarý ıelerine qosymsha mindetter júkteledi", – dep tolyqtyrdy Janna Asanova.