Jaı kúnderi «anaý jetpeıdi, mynaý jetpeıdi» dep jylap otyramyz. Biraq qalaǵa bir álemdik juldyz kele qalsa, alpys myńdyq konsert bıleti alty sekýndta satylyp ketedi.
Suranystyń kóptigi sonshalyq tipti arnaıy qosymshalar halyqtyń nópirine shydamaı, isten shyǵyp jatady. Osyndaıdan keıin ózimizdi kedeımiz dep aıta alamyz ba?
Taǵy bir mysal. Bıyldan bastap kólik nómirin tańdap satyp alýyna múmkindik beretin zań kúshine endi. Eń arzan nómirdiń ózi 42 myń teńgeden bastalady. Soǵan qaramastan arnaıy halyqqa qyzmet kórsetý ortalyqtarynda adam qarasy qalyń, kezek tipti kóshege deıin shyǵyp ketken.
Osydan keıin «eldiń aqshasy joq» dep aıta almaımyz aý. Bul az deseńiz, jaqynda Vetnamnyń Fýkýok aralynda kádimgi qazaqtyń «qyzyl órigi» qoıylyp, týrıser jınalatyn alańqaı bir sátke Shymkenttegi meıramhanaǵa aınalyp ketken. Shańyn shyǵaryp bılep jatqan ózimizdiń qarakózder. Týrıserdiń deni – otandastarymyz.
Aqsha joq bolsa, Vetnam, Dýbaı, Taılandtyń jaǵajaılaryn qalaı toltyryp júrmiz? Áke-sheshemizdiń aýylyna barǵandaı, shabadanymyzdy alyp, oılanbastan jolǵa shyǵamyz. Barǵan soń saýyq quryp, qolymyzdaǵy jap-jańa aıfon 17-men jarqyldatyp sýretke túsemiz.
Kez kelgen avtosalon nemese úı satatyn kompanıa shaǵyn ǵana aksıa jarıalasynshy kezek tańǵy besten bastalyp ketedi. Eger shynymen aqsha joq bolsa, ondaı kezekte turmas edik qoı.
Jaqynda oraza aıy. Aýyz bekitip, aýyzashar jasaımyz. Sol baıaǵy ádetimizden tanbaı, dastarhanymyzdy asta-tók jasap, daraqylyqqa jol beremiz. Mýftıattyń qasıetti aıda «ysyrapshyldyqqa jol bermeıik» degen qarapaıym talaptaryna da pysqyrmaımyz. Munyń bári ne úshin? Maqtan úshin be?
Shyn máninde másele kedeılikte emes. Másele óz qaltamyzǵa qaramaı ómir súrýimizde. Toı úshin, demalys úshin, jańa aıfon úshin nesıe alyp, tynysh jınap, shamasyna qaraı ómir súrýdiń ornyna, kózge túsýge tyrysamyz. Sosyn baryp taǵy da «aqsha joq» dep shaǵynamyz. Aqsha joq emes bar. Tek biz ótirik jylaıtyn sıaqtymyz.