Aqpan aıynda «Enbek» elektrondyq eńbek bırjasynda 121,8 myń bos jumys orny týraly málimet jáne 132,3 myń túıindeme ornalastyryldy.
Ótken aımen salystyrǵanda bos oryndar sany 23,2% - ǵa, al túıindeme sany 31% - ǵa (-59,6 myń) azaıdy, dep habarlaıdy aqshamnews.kz.
Osylaısha, eń kóp bos jumys oryndaryn aqparat jáne baılanys (40,9 myń), bilim berý (26,6 myń) jáne densaýlyq saqtaý (9,3 myń bos jumys orny) salalaryndaǵy kásiporyndar ornalastyrdy. Bul rette densaýlyq saqtaý salasynda sanıtarlar (1,5 myń) jáne medbıkeler (1,3 myń bos jumys orny) barynsha suranysqa ıe boldy.
Suranystyń biliktilik qurylymynda joǵary bilikti izdenýshiler kósh bastap tur (barlyq bos jumys oryndarynyń 59%), odan keıin ortasha bilikti (29%) jáne biliktiligi joq (12%).
Óńirlik bóliniste bos jumys oryndar sanynyń eń kóp ósýi Batys Qazaqstan (+301%), Shyǵys Qazaqstan (+156%) jáne Qaraǵandy (+76%) oblystarynda baıqalady. Sonymen birge bos jumys oryndar sanynyń eń kóp tómendeýi Jetisý (-33%), Shymkent qalasy (-26%) jáne Mańǵystaý oblysynda (-25%) tirkeldi.
Usynys tarapynan túıindeme sanynyń edáýir tómendeýi Mańǵystaý oblysynda (-46% nemese 5,8 myń birlik), Jetisý oblysynda (-45% nemese 4,3 myń birlik) jáne Jambyl oblysynda (-44% nemese 6,3 myń birlik) baıqaldy.
Genderlik qurylym boıynsha ózgerister tirkelmegen: máselen, áıelder (53%) áli de erlerge (47%) qaraǵanda jıi jumys izdeıdi. 26-35 jas sanaty eń belsendi bolyp qalady (26,6%), odan keıin 36-45 jas toby (26,1%). 25 jasqa deıingi jastardyń úlesi 14,9%, al 55 jastan asqan úmitkerlerdiń úlesi 12% quraıdy.
Jalaqyǵa keletin bolsaq, eń joǵary jalaqy bas qurylysshylarǵa (orta eseppen 663 myń teńgeden bastap), telekomýnıkasıadaǵy joba jetekshilerine (~653 myń teńge) jáne ónimdi ázirleý jónindegi basshylarǵa (~625 myń teńge) usynyldy. Sonymen qatar IT-bólimsheler basshylarynyń (orta eseppen 1,3 mln teńgeden bastap), energojúıe ınspektorlarynyń (~1,3 mln teńge) jáne geofızıkterdiń (~1,2 mln teńge) pozısıalaryna úmitker izdenýshiler eń joǵary jalaqyny surady.
Osylaısha 2025 jyldyń aqpanynda EEB-da túıindemeler sany azaıǵan kezde bos jumys oryndar sanynyń aıtarlyqtaı ósýi baıqaldy. Joǵary bilikti mamandar, ásirese IT, bilim berý jáne medısına salalarynda áli de suranysqa ıe. Bul rette salalyq jáne kásiptik bóliniste jalaqy boıynsha usynystar men kútýler arasyndaǵy alshaqtyq saqtalady.