Bıyl 13 myńnan astam adam qyzylsha juqtyrǵan.
Ajar Ǵınıat qazaqstandyqtardy qyzylshaǵa qarsy ekpe alýǵa shaqyrdy, dep habarlaıdy Almaty-akshamy.kz úkimettiń resmı arnasyna silteme jasap.
Qazirgi ýaqytta Qazaqstanda, sondaı-aq álemniń kóptegen elinde qyzylsha aýrýyna qatysty qolaısyz epıdemıologıalyq jaǵdaı qalyptasyp otyr.
Mınıstr sońǵy eki aıda elimizde syrqattanýshylar sany kúrt óskenin, bıyl 13 myńnan astam adam qyzylsha juqtyrǵanyn málimdedi. Onyń aıtýynsha, aýrý juqtyrǵandardyń 83 paıyzy balalar, negizinen 5 jasqa deıingiler. Olardyń 70 paıyzy ekpe almaǵan. Naýqastardyń arasynda ekpe almaǵan eresekter de bar.
Ajar Ǵınıat ınfeksıanyń taralýynyń artýy saldarynan Qazaqstanda qosymsha jappaı ekpe alýdy júrgizý týraly sheshim qabyldanǵanyn, bul qańtar aıynyń sońyna deıin jalǵasatynyn aıtty.
Mınıstrdiń aıtýynsha, elimizde vaksına jetkilikti.
«Vaksınalaý mártebesi joq balalarǵa, ınfeksıa oshaqtarynda bolǵan eresekterge ekpe egemiz. Barshańyzdy aýrýdan saqtaný úshin emhanaǵa shaqyramyz», - dedi Ajar Ǵınıat.
Densaýlyq saqtaý mınıstri ınfeksıalyq aýrýdyń ekpemen aldyn alýǵa bolatynyn eskertti.
«Búgingi tańda qyzylsha vırýsynyń ózine tán emi joq, sondyqtan mundaı qaýipti ınfeksıadan qutylýdyń jalǵyz joly ekpe egý bolyp otyr. Vaksınanyń ózinen qoryqpaý kerek, ol tekserilgen. Biz ony jyl saıyn ulttyq egý kúntizbesine sáıkes qoldanamyz»,-dedi Ajar Ǵınıat.