Almaty qalasyndaǵy №118 mektep-gımnazıasynda 1 maýsym – Halyqaralyq balalardy qorǵaý kúnine oraı erekshe medısınalyq-profılaktıkalyq aksıa uıymdastyryldy. "Densaýlyǵyńdy tekser" atty bul is-shara №11 qalalyq emhanamen birlesip ótkizildi. Shara aıasynda mektep oqýshylary medısınalyq tekseristen ótip, arnaıy sertıfıkat aldy.
Balalar densaýlyǵyna nazar aýdarýǵa baǵyttalǵan sharaǵa 120-ǵa jýyq bala qatysty. Aksıanyń maqsaty men mazmuny jaıly №11 qalalyq emhananyń profılaktıka jáne psıhoáleýmettik kómek bóliminiń meńgerýshisi Alóna Zekýnova aıtyp berdi.
"Bul shara balalardyń densaýlyǵyn qorǵaýǵa, aýrýlardyń aldyn alýǵa baǵyttalǵan. Búgingi medısınalyq tekserý – balalar úshin asa mańyzdy profılaktıkalyq shara. Mundaı tekserýler bala densaýlyǵyn baqylaýda ustaýǵa, aýrýlardy erte kezeńde anyqtaýǵa, sonymen qatar onyń psıhofızıkalyq damýyn baǵalaýǵa kómektesedi. Balanyń alǵashqy dárigerlik baqylaýy ol áli náreste kezinde-aq bastalady. Al bir jastan bastap 17 jasqa deıin olar jyl saıyn tolyq tekseristen ótip turýy kerek. Keıbir jas kezeńderinde tereńdetilgen dıspanserlik baqylaý da qarastyrylǵan. Búgingi tekserý nátıjesinde balalar arasynda jıi kezdesetin artyq salmaq, kórý qabiletiniń nasharlaýy, skolıoz jáne karıes sıaqty máseleler anyqtaldy. Bul aýrýlar syrt kózge baıqalmaýy múmkin, sondyqtan osyndaı josparly profılaktıkalyq sharalar olardyń aldyn alýǵa kómektesedi", — deıdi Alóna Zekýnova.
Arnaıy is-shara balalardyń óz densaýlyǵyna nazar aýdarýǵa yntalandyrady deıdi №118 mektep-gımnazıasy dırektorynyń tárbıe isi jónindegi orynbasary Dılnaz Nýrdýn.
"Jyl saıyn 1 maýsym – Balalardy qorǵaý kúnine oraı osyndaı aýqymdy shara uıymdastyramyz. Bıylǵy aksıa da osy dástúrli shara aıasynda ótti. №11 emhananyń qoldaýymen júzege asqan búgingi tekserý balalardyń óz densaýlyǵyna jaýapkershilikpen qaraýyna túrtki boldy dep senemiz. Balalar óz densaýlyǵy týraly naqty aqparat aldy. Bul ári mektep, ári emhana úshin úlken jetistik dep esepteımiz", – deıdi Dılnaz Nýrdýn.
Mektep jasyndaǵy balalardyń densaýlyǵy – qoǵam bolashaǵynyń negizi. Sebebi dál osy kezeńde balanyń aǵzasy qarqyndy damyp, túrli ózgeristerge ushyraıdy. Ýaqtyly tekserý men aldyn alý – olardyń densaýlyǵyn uzaq jyldarǵa saqtaýdyń eń tıimdi joly. «Densaýlyǵyńdy tekser» aksıasy balalardyń densaýlyǵyna sergek qaraýǵa, salaýatty ómir saltyn ustanýǵa, ári ata-analar men ustazdardyń densaýlyq tárbıesine jaýapkershilikpen qaraýyna zor úles qosty.