Túsirilim toby Denıstiń bastapqy senarıin ózgerissiz qaldyrýǵa tyrysqan
Tanymal mánerlep syrǵanaýshy bolǵan Denıs Tenniń senarıimen túsirilgen «Soqyr mahabbat» fılmi kınoteatrlarda kórsetile bastady, dep habarlaıdy Almaty-akshamy.kz QazAqparatqa silteme jasap.
Qaıǵyly oqıǵadan bir aı buryn, 2018 jyldyń maýsymynda Denıs Ten fılm senarıin Screenlife Contest baıqaýyna joldaǵan jáne fınalıster qatarynan kóringen.
Túsirilim jumystary sportshy óliminen keıin 2019 jyly bastalǵan. Oǵan Venesıa kınofestıvaliniń jeńimpazy Chak Che rejıserlik etse, tanymal rejıser Tımýr Bekmambetov pen Denıstiń anasy Oksana Ten bas prodúser boldy. Elordadaǵy tusaýkeserge Denıs Tenniń anasy, dostary, tanymal akterler jáne QR Mádenıet jáne sport mınıstrliginiń ókilderi keldi.
Sonymen birge, Nur-Sultandaǵy zaǵıptar qaýymdastyǵy úshin arnaıy kınozal ázirlendi, onda fılmniń aýdıodıskrıpsıasy qatar júrgizildi. Óıtkeni, fılm jelisi zaǵıp jigit pen kereń jáne mylqaý boıjetken arasynda órbıdi. Jańa tehnologıalar múmkindigi shekteýli jandardyń bir-birin túsinisýine kómektesedi. Fılmniń jalpy uzaqtyǵy – 33 mınýt, túsirilim toby Denıstiń bastapqy senarıin barynsha ózgerissiz qaldyrýǵa tyrysqan.
Bul týyndynyń qalaı túsirilgeni týraly Qanat Beısekeevtiń «Fılm týraly fılmi» qosa kórsetiledi. Derekti fılmde Denıstiń aǵylshyn tilinde jazǵan óleń shýmaqtary, ánderi kınokartınada kórsetiletini aıtylǵan.
«Biz suhbat qurý úshin sıfrlyq habarlamalar, emodzıler jáne basqalaryn paıdalanatyn álemde ómir súrip jatyrmyz. Bul ıdeıa ózime de qyzyq boldy. Men qatty qobaljyp júrmin, óıtkeni bul jaı ǵana qysqametrajdy fılm emes. Bul Denısten qalǵan amanat, biz jaqsy kóretin jáne qurmetteıtin adamnyń bastamasy. Bul bastamany buzǵymyz kelmeıdi nemese bostan-bos ótkizip alǵymyz kelmeıdi. Munda men minsiz fılm jasaǵym keledi, onyń ózi, aınalasyndaǵy jaqyndary kútkennen de jaqsy týyndy usynǵym keldi. Fılmde Denıstiń jankúıerlerine unaıtyn keremet sátter bar, kóptegen tosynsyılar jasyrylǵan. Tipti Denıs týraly estimegen sheteldikter de osy fılm arqyly aıtqymyz kelgen qundylyqtardy túsiner edi», - dedi fılm rejıseri Chak Che.
Sonymen birge, sportshynyń jaqyn dosy Igor Saı fılmniń atqarýshy prodúseri boldy.
«Biz Los-Andjeleste kezdestik, men jańa kıno jobasymen jumys istep júrdim, al Denıs jattyǵýǵa keletin. Sonda Denıske senarı jazyp, Screenlife Contest baıqaýyna qatysýdy usynǵan edim. Muny umytyp ta ketippin, úsh aıdan keıin Denıstiń senarıi fınalǵa ótkenin jáne Máskeýde óz ıdeıasyn qorǵaıtynyn estidim. Men onyń áńgime, án jazatynyn biletinmin, senarı de jaza alatynyna senimdi boldym. Óıtkeni, ol muz aıdynynda óz tánimen, bıimen hıkaıa baıandaıtyn storıteller edi», - dedi I. Saı.