Keıingi jyldary qoǵamda balamen úıde otyratyn analar ǵana emes, dekrettik demalysqa shyǵatyn ákeler de kóbeıip keledi. Tipti tanymal er-azamattardyń ózi otbasyn birinshi orynǵa qoıyp, ýaqytsha mansabyn shegerýge daıyn ekenin kórsetip júr. Aqshamnews.kz tilshisi ákeler kúnine oraı dekretke shyqqan tanymal ákelerdi tizdi.
Kásipker Tursyn Alagózov qyzdary úshin dekretti tańdady
Alagózovtar otbasy úshin byltyr qýanyshqa toly jyl boldy. Tamyzda qatarynan eki márte ata-ana atanǵan olar bala kútimine erekshe mán bergen. Alma jáne Alına esimdi qyzdardyń ákesi - Tursyn Alagózov qyzdary úshin dekrettik demalysqa shyqqan. Tipti basynda úıden shyqpaı, qyzdarynyń jaǵdaıyna qatty qaraǵan. Bul týraly kásipkerdiń jary Baıan Maqsatqyzy suhbattarynyń birinde aıtqan edi.
“Bala týyp, úıde otyratyn áıelderdi túsinbeımin. Olar únemi sharshap júredi. Bala men kúıeýdiń jaǵdaıy nemese úıdiń tirliginen qoldary bosamaıdy. Meniń balalarym eshqashanda mazamdy alǵan emes. Túnimen uıyqtamaı, bolmasa jylap, mazalaǵan emes. Eki qyzymdy týǵanda da dekrette otyrǵan emespin. Qazir Tursen dekret demalysynda otyr. Ol tipti úıden shyqpaıdy. Alǵashqy 15 kún múldem úıden shyqpaı qoıdy. Al men ekinshi kúni kınoǵa túsip kettim. Meniń amalym bolmady. Ol únemi qorǵan bolǵysy keledi. Barlyq ákelik qasıetterin kórsetip jatyr. Birese áńgime aıtady, birese ázildep qoıady. "Olar meniń ákesi ekenimdi bilýi kerek, ıisimdi, daýysymdy tanýy kerek" degen ýaıymmen júredi", – dep aǵynan jaryldy prodúser.
sýret: inst/bayanmaxatkyzy
"Balam úshin jumystan bas tarttym" - Alem
Ninety One tobynyń solısi Alem de áke atanyp, dekrettik demalysqa shyqqan juldyzdardyń qatarynda. Ol bul sheshimge qalaı kelgenin suhbattarynyń birinde aıtqan edi.
"Men qazir jumys istep júrgen joqpyn. Balam úshin jumystan bas tartyp, dekretti tańdadym. Bala baǵý ońaı nárse emes. Álemdegi eń qıyn jumystardyń biri. Psıhoemosıonaldyq turǵydan da, fızıkalyq turǵydan da kóp energıany qajet etedi. Men stýdıaǵa baryp, jumysymdy jalǵastyryp, úıge kesh kelip, bala tárbıesine aralaspaı júrsem de bolar edi. Biraq bul bir áıel adam úshin óte aýyr nárse", - dedi Alem.
sýret: inst/xcialem
"6 aıǵa dekretke shyqtym" - Zaq
Byltyr áıgili Ninety One tobynyń taǵy bir memberi Zaq laqapatymen belgili Dýlat Muhametqalı de áke atandy. Aırın esimdi qyzdyń ákesi de otbasy úshin dekrettik demalysty tańdaǵan. Bul týraly ol óziniń áleýmettik jelidegi paraqshasynda bólisken bolatyn.
"Men 6 aıǵa dekretke shyǵyp, otbasymmen birge bolýdy tańdadym. Úıde otyrǵan kezde áleýmettik jeliler men jańalyqtardy jıi qaraı bastadym. Álemnen qalyp qoımaıyn dep oıladym. Biraq jelide tek negatıv, janjaldar men maqtanshaqtyq kóbeıip ketkenin baıqadym. Bul meni ýaıymǵa salyp, túrli qorqynyshtar týǵyza bastady. Kúndiz qyzymmen birge oınap, kúlip júrsem de, túnde áıelim men qyzym uıyqtap jatqanda, men lentany sheksiz atqara beretinmin. Sol kezde ishimde kúızelis jınala berdi. Buryn men buny demalys dep oılaıtynmyn, al shyn máninde, ózimdi odan saıyn sharshattym. Qazir túsindim, demalys taza, janǵa jaıly bolýy kerek jáne múmkindiginshe telefonsyz bolǵany jaqsy”, – dedi ánshi.
sýret: inst/zaqcount
Eske salaıyq, 2025 jyldyń alǵashqy 4 aıynda elimizde 863 áke resmı túrde dekrettik járdemaqy alǵan. Byltyr - 477, al 2023 jyly 583 áke bala kútimine baılanysty áleýmettik demalysqa shyqqan.