Dúnıejúzilik densaýlyq saqtaý uıymy NATURCOLD preparatynyń qaýiptiligi týraly eskertedi.
Bul dári Qazaqstan Respýblıkasynda tirkelmegen, dep habarlaıdy Almaty-akshamy.kz QazAqparatqa silteme jasap.
«Buqaralyq aqparat quraldarynda Úndistannyń Densaýlyq saqtaý mınıstrligi jótelge qarsy sırop shyǵaratyn Riemann Labs farmasevtıkalyq kompanıasynyń qyzmetine tyıym salǵany týraly aqparat tarady. Kamerýndaǵy balalar osy sıroptyń saldarynan qaıtys bolýy múmkin dep kúdiktenedi. Kompanıanyń lısenzıa nómiri NATURCOLD preparatynyń qaptamasyndaǵy lısenzıa nómirine sáıkes keledi. Aıta keteıik, NATURCOLD Qazaqstan Respýblıkasynda tirkelmegen, sondaı-aq kóterme jáne bólshek saýda segmentinde satylmaıdy», - delingen Komıtet aqparatynda.
Sondaı-aq, bul sıroptyń quramyndaǵy málimdelgen belsendi zattar – parasetamol, fenılefrın gıdrohlorıdi jáne hlorfenıramın maleaty. Aqparatqa sáıkes, bul zattar ártúrli kombınasıalarda sýyq tıý, tumaý jáne alergıalyq rınıt belgilerin jeńildetý úshin qoldanylady.
«Dúnıejúzilik densaýlyq saqtaý uıymynyń resmı málimetteri boıynsha, 2023 jyldyń 27 maýsymynda Kamerýnnan NATURCOLD sıropynyń úlgileri DDSU-na berildi jáne zerthanalyq zertteýlerden ótti. Úlgilerdi zerthanalyq taldaý preparattyń jol berilmeıtin joǵary konsentrasıada dıetılenglıkolmen lastanǵanyn kórsetti. NATURCOLD sıropynyń úlgilerindegi dıetılenglıkoldiń úlesi 28,6%-ǵa jetti. Dıetılenglıkoldiń shekti ruqsat etilgen konsentrasıasy 0,10%-dan aspaıdy.
Dıstrıbútor preparattyń qaptamasynda - FRAKEN INTERNATIONAL (Anglıa) kórsetilgen. Alaıda, Ulybrıtanıanyń Ulttyq retteý organy (MHRA) bul ataýmen óndirýshi Ulybrıtanıada tirkelmegenin rastady. Qazirgi ýaqytta preparattyń shyǵý tegin anyqtaý maqsatynda tergeý júrgizilip jatyr.
DDU ishken kezde dıetılenglıkol adamdar úshin ýly ekenin jáne ólimge ákelýi múmkin ekenin eskertedi.
Sonymen qatar, kondısıonerlenbegen lastanǵan ónimder pasıenttiń densaýlyǵyna, ásirese balalardy emdeýde úlken zıan keltirýi, sonymen qatar ólimge ákeletin ýlanýdy týdyrýy múmkin.
NATURCOLD dárilik preparaty tabylǵan jaǵdaıda respýblıka boıynsha zańnamaǵa sáıkes tıisti ákimshilik sharalar qabyldanatyn bolady», - delingen vedomstvo habarlamasynda.