Maımyl sheshegi ınfeksıasyn juqtyrǵandardyń sany 3413 adamǵa jetken.
Dúnıejúzilik densaýlyq saqtaý uıymy (DDSU) 2022 jyldyń basynan beri 50 elde 3413 adamnyń maımyl sheshegi ınfeksıasyn juqtyrǵanyn jáne bir adamnyń qaıtys bolǵany týraly aqparat berdi. Bul týraly seısenbide Jenevada jarıalanǵan DDSU aqparattyq búlleteninde jazylǵan, dep habarlaıdy Almaty-akshamy.kz Almaty.tv silteme jasap.
«2022 jyldyń 1 qańtary men 22 maýsymy aralyǵynda DDSU-ǵa uıymnyń bes aımaǵynda ornalasqan 50 el men aýmaqtan maımyl sheshegin juqtyrýdyń 3 413 jaǵdaıy jáne osy dertten bir adamnyń qaıtys bolǵany habarlandy», - dep atap ótti uıymnan.
Aldyńǵy aqparattyq búleten 17 maýsymda jarıalanǵannan beri segiz elde ınfeksıaǵa shaldyǵýdyń 1310 jańa jaǵdaıy anyqtalǵan. Maımyl sheshegimen aýyratyndardyń kópshiligi (86%) Eýropalyq aımaqta tirkeldi. Odan keıin tizimde Amerıka (11%), Afrıka (2%), Shyǵys Jerorta teńizi (1%-dan az) jáne Azıa-Tynyq muhıty (1%-dan az) tur. Elderdiń ishinde aýrýǵa shaldyǵýdyń eń kóp jaǵdaıy Ulybrıtanıada tirkeldi, onda 793 adam maımyl sheshegine shaldyqqan. Sonymen qatar eń kóp naýqastar sany jaǵynan Germanıa (521), Ispanıa (520), Portýgalıa (317), Fransıa (277), Nıderlandy (167) jáne AQSH (142) tirkeldi. Qalǵan 43 memleket pen aýmaqta aýrýǵa shaldyǵý jaǵdaılarynyń sany 100-den aspaıdy.
Ázirge vırýstan qaıtys bolýy jaǵdaıy Nıgerıada ǵana tirkeldi. DDSU epıdemıologıalyq jaǵdaıdy jiti baqylaýda. Uıym aýrýdyń jahandyq taralý qaýpin ortasha dep baǵalap otyr. Uıymnyń maımyl sheshegi jónindegi komıteti 23 maýsymda Jenevada ótken otyrysynda indet halyqaralyq deńgeıde alańdaýshylyq týdyratyn tótenshe jaǵdaı emes degen qorytyndyǵa keldi.