Instagram-da Dúnıejúzilik densaýlyq saqtaý uıymy qajet bolǵan jaǵdaıda jańa aýrýlar shyǵarady degen aqparat tarady. Bul shyndyqqa janaspaıdy, dep habarlaıdy almaty-akshamy.kz
DDSU 10 jyl boıy pandemıa uıymdastyrady degenge senýge negiz joq. 2023 jyldyń 5 mamyrynda uıym COVID-19 endi densaýlyq saqtaý salasyndaǵy tótenshe jaǵdaı emes ekenin resmı túrde jarıalady. Sodan beri eshqandaı jańa pandemıa jarıalanǵan joq, sondaı-aq ǵalymdar osy kezeńde buryn belgisiz bolǵan aýrýlardy tappaǵan.
Postta aıtylyp otyrǵan DDSU-nyń 10 jyldyq jospary «Pandemıalyq jáne epıdemıalyq áleýeti bar patogenderdi genomdyq baqylaýdyń jahandyq strategıasy, 2022-2032 jj.» dep atalady. Bul qujat barshaǵa qol jetimdi jáne kez kelgen adam onymen tanysa alady. Onda 10 jyl boıy pandemıa uıymdastyrý týraly sóz joq. Kerisinshe, josparda burynnan belgili patogenderdi baqylaý jáne ony kúsheıtýdi jáne olardyń jahandyq taralý qaýpi bolǵan jaǵdaıda shuǵyl áreket etý qarastyrylǵan.
Taraǵan postta paıdalanýshylar golandıalyq vırýsolog Marıon Kýpmanstyń sózine súıenedi, alaıda ol DDSU pandemıalar uıymdastyrady dep málimdemegen. Onyń mundaı dáıeksózderi onlaın BAQ-ta da, ashyq qol jetimdi beınematerıaldarda da tabylǵan joq.
2020 jyly ol álemde COVID-19 sıaqty aýrýlardyń jańa oshaqtary boýly yqtımal dep aıtqan. Alaıda, bul osy oshaqtardy DDSU týdyrady nemese qozdyrǵyshtar qasaqana jasalady degendi bildirmeıdi.
Demek, taralǵan aqparattaǵy negizgi málimdemelerdiń bári jalǵan. DDSU pandemıa uıymdastyrmaıdy, uıymnyń 10 jyldyq josparynda bul týraly aıtylmaǵan, al vırýsolog Marıon Kýpmans buǵan qatysty málimdeme jasaǵan joq.