Sıfrlyq damý, ınovasıalar jáne aeroǵarysh ónerkásibi mınıstri Baǵdat Mýsın keleshekte daýys berý júıesine eki jańashyldyq engizý josparlanyp otyrǵanyn málim etti, dep habarlaıdy Almaty-akshamy.kz QazAqparatqa silteme jasap.
Mınıstrdiń aıtýynsha, mundaı tásil saılaý prosesine jalǵan búlletenderdiń qosylýyn boldyrmaıdy.
«Biz Ortalyq saılaý komısıasymen birge eki máseleni talqylap jatyrmyz. Mysaly, daýys berýshini saılaý okrýgine bekitý jáne tirkeýden shyǵarý máselesi bar. Bir oblystan ekinshi oblysqa baryp daýys beretin bolsa, turǵylyqty okrýgte tirkeýden shyǵýy kerek. Keleshekte osyny onlaın túrde jasaýǵa bolady», - dedi ol depýtattar saılaýynda daýys berip bolǵannan keıin.
Sondaı-aq Baǵdat Mýsın saılaý jáshikterin jańa tehnologıamen jabdyqtaý máselesi talqylanyp jatqanyn atap ótti.
«Jáshikke búletendi salǵan kezde, qansha búleten túskenin avtomatty túrde kórsetip tursa degen oıymyz bar. Iaǵnı, mundaı tehnologıa salǵan búlletinińizdiń eshqandaı qoldan jasalǵan qujat emes ekenin, zańdy qujat ekenin rastaıdy. Saılaý jáshigi qazirgideı bolady. Biraq kishkentaı kompúterleri bolady. Osyndaı usynys bar. Qazirgi tańda bul birneshe elde júzege asyrylǵan. Keleshekte Ortalyq saılaý komısıasymen talqylaý jalǵasady. Qazir búletenderdi baqylaýshylar sanasa, endi baqylaýdyń taǵy bir mehanızmi paıda bolady. Ol jalǵan búletenderdiń qosylyp ketpeýine septigin tıgizedi», - dedi mınıstr.