Lagerlerde maman tapshylyǵy da qatty sezilip otyr.
Depýtat balalar lagerin jazǵy demalys orny nemese saýyqtyrý orny dep ataýdy usyndy, dep habarlaıdy Almaty-akshamy.kz
Depýtat keńestik ıdeologıamen sanamyzǵa sińgen lager sózin jazǵy saýyqtyrý ortalyqtary sózimen aýystyratyn ýaqyt jetti dep sanaıdy.
"Lager sóziniń shyǵý tarıhy men tarıhtaǵy lagerlerdiń tolqyny tek jaman sıpatta ekenin bilemiz. Aty qorqynyshty Karlag, Aljır lagerleriniń paıda bolý tarıhy barshaǵa málim. Sondyqtan ulttyq sana-sezimdi jańǵyrtýda lager ataýyn almastyrýdyń máni zor dep bilemin. Lager emes, balalardyń jazǵy demalys orny nemese saýyqtyrý orny degenimiz jón", - degen usynys tastady Muqaev premer-mınıstr men oqý-aǵartý mınıstrine joldaǵan depýtattyq saýalynda.
Sondaı-aq ol lagerler arasynda naqty belgilengen baǵa saıasaty da joq ekenin atap ótti.
"Ár ata-ana balasynyń jaqsy saýyqtyrý ortalyqtaryna barǵanyn qalaıdy. Áıtse de kóp ata-ananyń qaltasyna aýyr keletinin eskersek, baǵaǵa saı sapa bolýy kerek. Muny tek memlekettik emes, jeke menshik lagerlerden de talap etilýi kerek", - dedi depýtat.
Aıtýynsha, lagerlerde maman tapshylyǵy da qatty sezilip otyr. Lagerlerdiń basym kópshiligine balalardy qaraýǵa ýaqytsha jumys retinde stýdentter tartylyp jatady.
"Óz bilimin tolyq jetildirmegen stýdentter mektep oqýshylaryn qalaı tárbıeleıdi? Sondyqtan lagerde jumys isteıtin mamandarǵa arnaıy oqytý kýrstary uıymdastyrylyp, mamandandyrylǵan ustazdar tartylýy kerek", - dep esepteıdi májilismen.
Budan bólek, Muqaev lager uıymdastyrýshylary mindetti túrde memlekettik mekeme tarapynan lager mazmuny men materıaldyq-tehnıkalyq bazalaryna sáıkes tekserýden ótip, lısenzıalanýy kerek ekenin aıtty.