Bul týraly Májilis depýtaty Baqytjan Bazarbek aıtty.
Onyń aıtýynsha, Almaty oblysy Eńbekshiqazaq aýdanyndaǵy Asysaǵa aýyly bir ǵana otbasy músheleriniń menshigi bolǵan, dep habarlaıdy Almaty-akshamy.kz
«Asysaǵa aýylynda 11 myń ga jaıylymdy jer bar edi. 2013-2015 jyldar aralyǵynda Bolat Nazarbaevtyń qoıǵan ákiminiń zańsyz qaýlysy saldarynan 11 myń ga-nyń 9 myń ga jaıylymdy jeri bir januıa músheleriniń jekemenshigine ótip ketken. Iaǵnı, ákesi – 2 300 ga, úlken uly – 1 370 ga, ortanshy uly – 1 340, ortanshy qyzy – 1 260 ga, kishi qyzy – 1 760 ga jáne onyń kúıeýi 1 670 ga jerdi ıelenip alǵan. Osylaısha, bútin bir aýyldyń jeri bir ǵana otbasy músheleriniń jekemenshik jáne jer paıdalaný quqyǵyna ótip ketken», - dedi depýtat.
Baqytjan Bazarbektiń sózinshe, «Jer amanaty» respýblıkalyq komısıasy onyń 6 500 ga jerin memlekettik menshik ıesine qaıtarypty.
«Bul mysaldy nege aıtyp otyrmyn? Jaıylymdy jerlerdiń máselesi Qazaqstannyń túkpir-túkpirinde óte ózekti bolyp tur. Biz «qoǵamdyq jaıylym» degen uǵymdy engizip otyrmyz. «Qoǵamdyq jaıylym» degen uǵymmen qosa, endi jemqorlyqqa belshesinen batqan ákimder qoǵamdyq jaıylymdy jerlerdi yǵaı-syǵaılarǵa berýge quqyǵy joq. Sebebi ol bazaǵa qoǵamdyq jaıylymdyq jerler retinde engiziledi», - dedi májilismen.
Ol naqty bir eldimekende 5 jyl turǵan azamat endi qosymsha upaıǵa ıe bolatynyn atap ótti.
«Jaıylymdy jerlerdi egistik jerlerge aınaldyrýǵa bolmaıdy. Sondaı-aq endi ákimder jaıylymdy jerlerdi rezervke qoıýǵa mindetteledi. Jaıylymdy jerlerdi kooperatıvterge beremiz jáne kooperatıvterdi qoldaımyz», - dedi Baqytjan Bazarbek.