Almatyda Qazaqstannyń halyq ártisi, Memlekettik syılyqtyń ıegeri Júsipbek Elebekovtyń 120 jyldyǵyna arnalǵan İİ Respýblıkalyq kolejaralyq dástúrli ánshiler baıqaýy ótip jatyr.
Baıqaý Mádenıet jáne aqparat mınıstrliginiń qoldaýymen Júsipbek Elebekov atyndaǵy respýblıkalyq estrada-sırk kolejinde uıymdastyrylyp otyr. Respýblıkalyq is-shara Júsipbek Elebekov eskertkishine gúl shoqtaryn qoıýdan bastaldy. Baıqaýdyń alǵysózin aıtqan QR eńbek sińirgen qaıratkeri, kolej dırektory Jeńis Seıdollauly is-shara maqsaty Júsipbek Elebekovtyń shyǵarmashylyǵyn keńinen nasıhattap, urpaqtan-urpaqqa jetkizý ekenin atap ótti.
– Júsipbek Elebekov atyndaǵy baıqaý ekinshi ret ótkizilip jatyr. Ol – elimizdiń tarıhyndaǵy biregeı tulǵa. Baıqaýdy ótkizýdegi maqsatymyz – dástúrli ándi joǵaltpaı, urpaqtar sabaqtastyǵyn jalǵastyryp, ony jastarǵa jetkizý. Bul kisilerdiń murasyn qazirgi jastar bilip, ári qaraı jalǵastyryp ketýleri kerek. Sol kezde bizdiń elimizdiń bolashaǵy jarqyn bolady, – dedi Jeńis Seıdollauly.
Baıqaý bastalmaı turyp barlyq qatysýshylar men is-shara qonaqtaryna Júsipbek Elebekov týraly «Biregeı» atty qysqasha derekti fılm kórsetildi. Sondaı-aq, eki kúnge sozylǵan baıqaý kúnderi QR halyq ártisi Ramazan Stamǵazy, QR mádenıet salasynyń úzdigi Sholpan Darjan, QR mádenıet qaıratkeri Armat Islámgalıev, Qazaqstannyń eńbek sińirgen qaıratkeri Nurjan Janpeıisov sheberlik dáristerin ótkizdi. Ekinshi kúni Respýblıkalyq kolejaralyq dástúrli ánshiler baıqaýy Yqylas atyndaǵy halyq mýzykalyq aspaptar mýzeıinde ótti.
Aıta ketken jón, Júsipbek Elebekov atyndaǵy respýblıkalyq estrada- sırk kolejiniń tarıhy – HH ǵasyrdyń 60-shy jyldarynan bastaý alady. KSRO aýmaǵynda Máskeý men Kıev estrada stýdıalarynan keıingi úshinshi, al respýblıka kóleminde alǵashqy bolyp shańyraq kótergen bilim ordasynyń qalyptasyp shyńdalýyna, qazaq mádenıetiniń aıtýly tulǵalary, Qazaqstannyń halyq ártisteri: Júsipbek Elebekov, Ǵarıfolla Qurmanǵalıev, Káýken Kenjetaev, Ydyrys Noǵaıbaev, Baqyt Qarabalına, Beken Jylysbaev, Habıdolla Tastanov, Fatıma Balǵaeva, Maǵaýıa Hamzın, Zeınep Qoıshybaeva, Nurǵısa Tlendıev jáne t.b. óner sańlaqtary zor úles qosty.
1967 jyly Gúljıhan Ǵalıevanyń jetekshiligimen stýdıanyń alǵashqy túlekterinen elimizde alǵashqy «Gúlder» estradalyq jastar ansambli, sondaı-aq, «Qazaq memlekettik sırki», «Memlekettik qýyrshaq teatry» quryldy. 1992 jyly stýdıaǵa ýchılıshe mártebesi jáne «Qazaqstannyń halyq artısi» Júsipbek Elebekovtyń esimi berilip, 3 jyldyq oqý merzimine kóshirildi. Al 1995 jyly oqý-bilim ordasy qazirgi zaman talabyna saı kolledj mártebesine ıe boldy.