Ońtústik astanadaǵy №2 Qalalyq klınıkalyq balalar aýrýhanasynyń ortohırýrgteri Reseıdiń N.Pırogov atyndaǵy Joǵary medısınalyq tehnologıalar klınıkasy mamandarymen birlesken sheberlik klasy aıasynda kúrdeli ortoplastıkalyq ota jasady.
Aýrýhana baspasóz qyzmetiniń málimetinshe, qyz bala polıdaktılıanyń kúrdeli túrimen týǵan. Onyń oń qolyndaǵy bas barmaǵy qosarlanyp ketken. Mamandardyń sózine súıensek, artyq saýsaqty alyp tastaý ońaı sharýa emes. Ol úshin qoldyń embrıologıasyn jetik bilý qajet. Onyń ústine, ishteı kemistik saldarynan qosarlanyp ketken bas barmaqtyń pishini buzylyp, tym jińishkerip ketken eki saýsaqtan bas barmaq jasaý qajet boldy.
Klınıkada ótken bes kúndik sheberlik klasy barysynda aıaq-qol kemistigimen týǵan nemese basqa da kúrdeli dıagnoz qoıylǵan qazaqstandyq 5 balaǵa ota jasaldy. Birneshe saǵatqa sozylǵan kúrdeli operasıalar mindetti áleýmettik medısınalyq saqtandyrý qarajaty esebinen jasaldy.
«Reseılik áriptester bizge «Mıloserdıe» qorynyń shaqyrtýymen keldi. Sheberlik klasyna Almaty, Pavlodar, Qaraǵandy, Taldyqorǵan, Almaty oblysynyń balalar ortopedteri, ortohırýrgter, anestızıologtar da qatysty. Kúrdeli ortoplastıkalyq jáne qalpyna keltirýge baǵyttalǵan otalarǵa qosa, kóptegen balalar bilikti mamandardan keńes aldy», - deıdi №2 QBKA dırektory Marat Rabandıarov.
Bir aıta keterligi, operasıalar jergilikti jansyzdandyrýdyń biregeı tehnologıasyn qoldana otyryp jasaldy.
«Bul tehnologıa barysynda prosesti tolyǵymen ÝDZ quraly arqyly baqylap otyrý qajet. Ol jansyzdandyrý kezinde qoldanylatyn narkoz mólsherin azaıtýǵa múmkindik beredi. Bala tez esin jıyp, narkozdyń keri áseri azaıady. Bala operasıa zalynda oıanady», - deıdi aýrýhananyń travmatologıa bólimshesi meńgerýshisi Erlan Sadyrbalın.