Pasıenttiń ómirine keler qaýip joq
Shymkent qalalyq balalar klınıkalyq aýrýhanasynyń dárigerleri alǵash ret búırektegi ehınokokk kıstasyna laparoskopıalyq ádispen operasıa jasady, dep habarlaıdy Almaty-akshamy.kz.
Tiliksiz ota kezinde dárigerler 17 jastaǵy naýqastyń búıreginiń joǵarǵy polúsynan shamamen 5,0*6,0 sm kıstozdy massany aldy.
Qalalyq balalar klınıkalyq aýrýhanasyna 2003 jylǵy naýqas sol jaq bel aımaǵyndaǵy aýyrsyný, álsizdik týraly shaǵymdarmen josparly túrde hırýrgıa bólimine jatqyzyldy. Anamnezde balaǵa 2020 jyldyń aqpan aıynda baýyrdaǵy ehınokokk kıstasyna operasıa jasalǵany anyqtaldy. Naýqas osy otadan keıin dıspanserlik baqylaýǵa alynyp, jylyna 2 ret josparly tekserýden ótip turǵan. Sońǵy 1 aı shamasynda joǵaryda atalǵan shaǵymdardyń mazalaýyna baılanysty ish qýysynyń últradybystyq zertteýi jáne ishtiń MRT skaneri jasaldy.
Tekserý barysynda sol jaq búırektiń kıstalyq túzilisi anyqtaldy. Qalalyq klınıkalyq balalar aýrýhanasynyń hırýrg dárigerleriniń tekserýinen keıin josparly ota jasalýynyń qajettiligi týraly keńes berildi.
«Naýqasqa sol jaq búırektiń laparoskopıalyq ehınokokkektomıasy otasy jasaldy. Ota kezinde sol jaq búırektiń joǵarǵy polúsinde shamamen 5,0*6,0 sm kıstozdy túzilis anyqtaldy. Ehınokokk kıstasynyń qabyrǵasy ashylyp, hıtındi qabyqshasy laparoskopıalyq jolmen alynyp tastaldy», - deıdi ota jasaǵan hırýrg Ákim Túlkibaev.
Operasıa sátti ótken. Pasıenttiń ómirine keler qaýip joq. Araǵa bir apta salyp, ota jasalǵan naýqas úıine shyǵarylǵan. Qazirgi jaǵdaıy jaqsy.