Elordadaǵy №1 kópsalaly qalalyq aýrýhananyń dárigerleri túrli jaraqattar men syrqattardan keıin rekonstrýksıalyq ota jasaýdy qajet etken 100-den asa naýqastyń ómir súrý jaǵdaıyn qalpyna keltirdi.
Pasıentterge bul kúrdeli de qymbat otalar – joǵary mamandandyrylǵan rekonstrýksıalyq kómek MÁMS júıesi boıynsha tegin jasalady, dep habarlaıdy almaty-akshamy.kz «Áleýmettik medısınalyq saqtandyrý qory» KEAQ Astana fılıalyna silteme jasap.
Rekonstrýksıalyq plasıkalyq hırýrgıa jaı ǵana plasıkalyq hırýrgıa emes. Hırýrgıanyń bul salasy jaraqattardyń, kúıikterdiń, týa bitken jáne júre paıda bolǵan aqaýlardyń saldaryn qalpyna keltirýmen aınalysady. Rekonstrýksıalyq hırýrgıanyń maqsaty – eń aldymen dene músheleriniń qyzmetin, sondaı-aq estetıkalyq kórinisin qalpyna keltirý.
«Rekonstrýksıalyq hırýrgıadaǵy árbir derlik jaǵdaı jan-jaqty daıyndyqty jáne uzaq ýaqyt qalpyna keltirýdi qajet etedi. Bizdiń pasıentterimizdiń jaǵdaıynda kóbine hırýrgıalyq aralasýdyń birneshe satysyn qajet etedi. Eń bastysy, bul otalardy pasıentterge tegin MÁMS aıasynda jasaýǵa múmkindigimiz bar, áıtpese, oılap qarańyz, tek bir naýqasqa sapaly ómir saltyna oralý úshin shamamen 8-9 qymbat ota qajet bolýy múmkin», - deıdi Astana qalasyndaǵy №1 kópsalaly qalalyq aýrýhananyń joǵary sanatty plasıkalyq hırýrgy Nurlybek Bekbaýov.
Osyndaı naýqastardyń biri Erjan elektrık bolyp jumys isteıdi, ol jumys kezinde elektr toǵynan jaraqattanǵan. Hırýrgtiń aıtýynsha, bastapqyda eki qoldy da kesý týraly sóz bolǵan, biraq dárigerler qoldyń ústińgi bóligi men saýsaqtaryn aman alyp qalǵan, bári ornynda. Úsh ret qalpyna keltirý kezeńinen ótkennen keıin eki qolymen de burynǵydaı jumys isteı alatyn boldy.
«MÁMS júıesiniń arqasynda men barlyq medısınalyq qyzmetterdi tegin aldym. Otadan keıin qoldarym áldeqaıda jaqsy qozǵala bastady, qoldarymdy erkin ashyp-juma alamyn. Terisi de jumsardy. Qalpyna keltirý boıynsha dáriger aıtqan barlyq usynymdardy oryndaımyn»,– dedi pasıent.
Dárigerdiń aıtýynsha, kóp azamattar el ishinde MÁMS júıesinde tegin emdelý múmkindigin bile bermeıdi, sheteldik emhanalardy tańdaıdy nemese múlde emdelmeı júre beredi. Qazirgi ýaqytta portal arqyly 24 túrli patologıany emdeýge bolady. Olar: qabaqtyń jumysyn buzatyn aqaýlar, kúıik pen úsik shalýdyń saldary, bas súıeginiń, bettiń súıekteriniń aqaýlary, t.b.
Elordada mundaı rekonstrýksıalyq otalar sany jyl sanap artyp keledi. Máselen, 2023 jyly MÁMS júıesi boıynsha bir ǵana №1 qalalyq aýrýhanada 100-den astam naýqasqa rekonstrýksıalyq ota jasaldy. Ótken jyldary ortasha eseppen 70-80 adam emdelgen.