Premer-Mınıstr Oljas Bektenovtiń tóraǵalyǵymen ótken Úkimet otyrysynda halyqty dári-dármekpen qamtamasyz etý sharalary qaraldy.
Densaýlyq saqtaý mınıstri Aqmaral Álnazarova, «SQ-Farmasıa» JSHS basqarma tóraǵasy Erken Jaqataev, sondaı-aq beınekonferensıa baılanysy arqyly iri otandyq farmasevtıka kompanıalarynyń basshylary: «Nobel Almaty farmasevtıkalyq fabrıkasy» atqarýshy dırektory Svetlana Kıl, «Hımfarm» kompanıasynyń memlekettik organdarmen ózara is-qımyl jónindegi dırektory Aıgúl Isenova baıandama jasady, dep habarlaıdy aqshamnews.kz Premer-mınıstrdiń resmı aqparattyq resýrsyna silteme jasap.
Densaýlyq saqtaý mınıstrliginiń málimetinshe, 2024 jyly dári-dármek pen medısınalyq maqsattaǵy buıymdardyń 1 588 túri satyp alynǵan. Ambýlatorıalyq dári-dármekpen qamtamasyz etýge 251 mlrd teńge bólindi, bul 120 nozologıa boıynsha qamtýdy 3,5 mln naýqasqa deıin arttyrýǵa múmkindik berdi. Aqmaral Álnazarova búgingi tańda 241 mlrd teńgege 1213 stasıonar dári-dármekpen qamtamasyz etilgenin atap ótti.
Premer-mınıstr dári-dármekpen úzdiksiz qamtamasyz etýdiń, sondaı-aq medısınalyq mekemeler úshin 2025 jylǵa arnalǵan dári-dármekter satyp alý jáne jetkizý rásimderin ýaqtyly aıaqtaýdyń mańyzdy ekenin atap ótti.
«Prezıdent ult densaýlyǵyn nyǵaıtý úshin keshendi sharalardy iske asyrýdy tapsyrdy. Bul oraıda halyqty dári-dármekpen qamtamasyz etý – asa mańyzdy másele bolyp otyr. Memleket medısınalyq kómek kórsetý kezinde jáne esepte turǵandarǵa dárilik zattardy tegin beredi. Bul maqsatqa bıyldyń ózinde búdjetten shamamen 500 mlrd teńge bólindi. Dári-dármekpen úzdiksiz qamtamasyz etý jáne olardy aldyn ala satyp alý – eń basty mindetterdiń biri. Aýrýhanalar men emhanalar úshin 2025 jylǵa arnalǵan dári-dármekterdi satyp alý men jetkizý rásimderiniń barlyǵyn osy jyldyń sońyna deıin aıaqtaý qajet. Medısınalyq mekemelerde dári-dármek tapshylyǵy degen múldem bolmaýy kerek», — dep basa aıtqan Oljas Bektenov, densaýlyq saqtaý mınıstri men «SQ-Farmasıa» JSHS basqarma tóraǵasynyń derbes jaýapkershiligin atap ótti.
Jalpy, dári-dármek naryǵyn jekemenshik óndirýshiler, jetkizýshiler jáne dárihana jelileri qalyptastyrady. Premer-mınıstr bul bıznesti memleket tarapynan preparattardyń qaýipsizdigi, sapasy jáne olardy tirkeý turǵysynan ǵana retteletinine nazar aýdardy. Máselen, bıyl dári-dármektiń óndirýshiden emdelýshige deıingi qozǵalysyn qadaǵalap otyrýǵa múmkindik beretin dárilik zattardy tańbalaý men qadaǵalaý engizildi. Sonymen qatar tegin preparattardyń zańsyz aınalymyna jol bermeý úshin aýrýhanalar men emhanalarda baqylaý tetigi qarastyrylǵan.
Otandyq farmasevtıka ónerkásibin damytý máselesine erekshe nazar aýdaryldy. Úkimet jergilikti dári-dármek óndirýshilerdi qoldaý sharalaryn iske asyrýda, bul dárilik zattar ımportyn azaıtýǵa jáne naryqtaǵy baǵasyn turaqtandyrýǵa múmkindik berip otyr. Premer-mınıstr qazaqstandyq zaýyttardyń óndiristik qýatyn eskere otyryp, olarda ónim shyǵarý kólemin ulǵaıtý, iri halyqaralyq farmasevtıkalyq kompanıalar men ǵylymı uıymdar arasynda yntymaqtastyq qajet ekenin basa aıtty. Densaýlyq saqtaý, Ǵylym jáne joǵary bilim mınıstrlikteriniń aldyna farmasevtıkalyq jańa óndirister ashýǵa jáne joǵary tehnologıalyq sheshimderdi engizý úshin qolaıly jaǵdaı jasaý mindeti qoıyldy.
Memleket basshysynyń sırek kezdesetin aýrýlary bar naýqastardy qymbat preparattarmen qamtamasyz etý jónindegi tapsyrmasyn oryndaý sheńberinde Densaýlyq saqtaý mınıstrligine «Qazaqstan halqyna» qorymen birlesip, orfandyq preparattardy satyp alýdy qarjylandyrý tizbesi men kózderin aıqyndap alýdy tapsyryldy. Premer-mınıstr eshkim de kómeksiz qalmaýy tıis ekenin basa aıtty. Bul baǵyttaǵy jumysty úılestirýdi jaqsartý maqsatynda respýblıkalyq orfandyq aýrýlar ortalyǵy quryldy.
Pasıentterge dári-dármek berý prosesin jeńildetý úshin «áleýmettik ámıan» júıesi arqyly dárilik zattarǵa elektrondy vaýcherler alý tetigin iske asyrýdy jedeldetý qajettigi jeke atap ótildi. Atalǵan mindet Densaýlyq saqtaý mınıstrliginiń aldyna qoıyldy. Budan basqa, dári-dármekpen qamtamasyz etý máseleleri boıynsha aqparattyq jumysty kúsheıtý tapsyryldy.
«Jurtshylyq kimge jáne qandaı dári-dármekter tegin beriletiNin naqty bilýi tıis. Memleket óz mindettemeLerin oryndap otyr», — dep atap ótti Oljas Bektenov.