Shildede dárilik zattardy tańbalaýdyń bastalýymen farmasevtıkalyq preparattardyń baǵasy ósýi múmkin, dep habarlaıdy almaty-akshamy.kz.
Telearna málimetinshe, Qazaqstanda farmasevtıkalyq preparattardyń quny sońǵy bir jylda 11 paıyzǵa ósken. Alaıda sarapshylar aldaǵy ýaqytta dárilik zattardy tańbalaý bastalǵanda baǵa taǵy ósetinin aıtady.
Óńirler arasynda farmasevtıkalyq ónimder baǵasynyń ósimi boıynsha Ulytaý oblysy kósh bastap tur. Munda dári-dármek 18,4 paıyzǵa qymbattaǵan. Odan keıingi orynda Astana men Shymkent qalalary tur. Al eń tómen baǵa Mańǵystaý oblysynda tirkelgen. Onda dári-dármek quny 5,6 paıyzǵa kóterilgen.
Qazaqstan táýelsiz dárihanalar qaýymdastyǵynyń basshysy Talǵat Omarovtyń sózinshe, Qazaqstandaǵy dári-dármektiń baǵasy kórshiles memlekettermen salystyrǵanda edáýir qymbat.
Tipti, 400-500 paıyzǵa jetip jatady. Jalpy baǵanyń ósýine áýeli ınflásıa áser etedi, - deıdi ol.
Dárihana ıeleri dabyl qaǵýda. 1 shildede dárilik zattardy tańbalaýdyń bastalýy farmasevtıkalyq preparattardyń baǵasyna keri áser etedi. Óıtkeni tańbalaý prosesine kásipkerler qarajatty óz qaltasynan tóleýge májbúr bolady.
Dárihanalardyń biriniń ıesi Áıgerim Amanbaeva «dárilerdi tańbalaý kontrafaktili óndirister men zańsyz taýar aınalym táýekelderin joıa almaıtynyn» aıtady.
«Biz kelisimshartpen jumys isteımiz. Salyq tóleımiz. Jalǵa alý aqysyn, eńbekaqy tóleımiz. Endi tańbalaý engizetin bolsaq, bizge qosymsha qarjy kerek bolady. Tańbalaý kishigirim bızneske óte qıyn», - deıdi ol.
Dárilik zattardy tańbalaýdyń engizilýi otandyq óndirýshilerge de ońaı soqpaıyn dep tur.
Tańbalaýǵa qajet eń arzan qural-jabdyq 100 myń dollardan bastalady. Odan keıin olarǵa 30 myń dollarǵa deıin baǵdarlama kerek.
«Qazaqtelekomnyń» baǵdarlamasy men óndiristiń baǵdarlamasyn júıelendirý úshin. Jylyna 2 mln rúblge deıin otandyq óndirýshiler taǵy tóleıdi», - deıdi «Qazaqstannyń farmmedındýstrıasy» qaýymdastyǵynyń atqarýshy dırektory Gúldarıa Manaqbaeva.
Dárihana ıeleri men otandyq óndirýshiler dárilik zattardy tańbalaý prosesin jetildirý kerek ekenin aıtady. Áıtpese, olardyń aıtýynsha, dári-dármektiń baǵasy aldaǵy ýaqytta 2 esege ósýi múmkin.