Darhan Satybaldy sýburqaqtardy qaıta jańǵyrtý jáne jańa qoǵamdyq keńistikterdi kóriktendirý barysymen tanysty
Almaty ákimi Darhan Satybaldy qaladaǵy abattandyrý jáne ınjenerlik ınfraqurylym nysandaryn aralady. Sapar barysynda Respýblıka alańyndaǵy sýburqaqtardy jańartý, Nazarbaev dańǵylynyń batysynda ornalasqan jańa skverdiń qurylysy jáne Lýganskıı kóshesindegi jerasty gaz qubyrynyń qaıta jańǵyrtýy qaraldy.
Sýburqaqtardy jańartý kezinde olardyń tarıhı kelbeti saqtalyp, sáýletshi Q. Montahaevtyń 1979 jyly jasaǵan sáýlettik murasy qaıta qalpyna keltirilýde. Joba aıasynda eýropalyq óndiristegi zamanaýı sorǵy jáne jaryq jabdyqtary, avtomattandyrylǵan basqarý júıesi jáne suıyq hlor qoldanbaı sýdy tazartý júıesi ornatylady.
Darhan Satybaldy qaıta jańǵyrtý jumystarynyń belgilengen merzimde ári sapaly, qaýipsiz oryndalýǵa tıis ekenin atap ótti.
Ákim barǵan nysandardyń biri Nazarbaev dańǵylynyń batysynda, Gandı kóshesiniń soltústiginde salynyp jatqan jańa skver. Skverdiń jalpy aýmaǵy 4,16 gektar, onyń ishinde 28 658 sharshy metr kógaldandyrý aımaǵy. Munda 245 jaryq shamy, 77 oryndyq jáne 52 qoqys jáshigi ornatý kózdelgen.
Sapar sońynda Darhan Satybaldy orta qysymdy jerasty gaz qubyryn qaıta jańǵyrtý barysymen tanysty. Jumysty «TAPS» JSHS kompanıasy «QazaqGaz Aimaq» AQ birlesip qolǵa alǵan.
Jalpy uzyndyǵy 4 shaqyrym bolatyn qubyrdyń 1951 metri tóseldi. Dıametri 530 mm jańa gaz qubyry eski 426 mm jelini almastyrady. Bul qalanyń ońtústik-shyǵys bóligindegi 9 myńǵa jýyq abonentti gazben qamtýdyń senimdiligin arttyrady.
Ákim qurylys qarqynyn jedeldetip, jumysty qazan aıynyń sońyna deıin aıaqtaýdy tapsyrdy.
Aıta keteıik, bul jumystar Almaty qalasynyń ınjenerlik jáne qoǵamdyq ınfraqurylymdy jańǵyrtý jónindegi keshendi baǵdarlamasy aıasynda júrgizilip jatyr. Barlyq joba qala pen aýdan ákimdikteriniń turaqty baqylaýynda.