Almaty mádenıettiń jańa formattaǵy eldiń rýhanı júregi retindegi mártebesin nyǵaıtyp keledi.
Aldaǵy jyldary qalada jańa kitaphanalar, murajaılar men teatrlar ashylyp, tarıhı nysandar jańǵyrtylyp, zamanaýı mádenı keńistikter qurylady. Bul týraly Almaty qalasy ákiminiń orynbasary Azamat Qaldybekov Almaty óńirlik komýnıkasıalar qyzmetiniń baspasóz konferensıasynda aıtty.
«Mádenıet – bul qalanyń kelbeti. Almaty árdaıym shyǵarmashyl adamdardy biriktiretin rýhanı ortalyq bolyp keldi jáne qaladaǵy ár aýdan osy mádenı energıany sezinetindeı jaǵdaı jasaý baǵytynda jumys júrgizip jatyrmyz», – dedi Azamat Qaldybekov.
Búginde Almatyda teatrlar men murajaılardan bastap galereıalar men kitaphanalarǵa deıin 100-den astam mádenıet mekemesi jumys isteıdi. Olardy jyl saıyn mıllıondaǵan qala turǵyndary men qonaqtary tamashalaıdy. Al aldaǵy jyldary bul kórsetkish aýqymdy jańǵyrtýlardyń arqasynda arta túspek.
25 jyldan beri alǵash ret Qazaq memlekettik sırkinde keshendi rekonstrýksıa bastaldy. Ańyzǵa aınalǵan ǵımarattyń tarıhı kelbeti saqtalyp, ishki qurylymy – ınjenerlik júıelerden bastap kórermen zalyna deıin – tolyq jańartylady. Sonymen qatar, Natalá Sas atyndaǵy orys balalar jáne jasóspirimder teatry men dástúrli óner teatry «Alataý» kúrdeli jóndeýden ótýde.
Almatynyń Ortalyqtandyrylǵan kitaphana júıesiniń 97% fılıaly jańǵyrtýdan ótti: munda ózdiginen kitap alý stansıalary, sıfrlyq tehnologıalar jáne erekshe qajettilikteri bar adamdarǵa arnalǵan oqý zaldary ashyldy.
2025 jyldyń sońyna deıin qaladaǵy bes aýdanda mektepter men turǵyn keshenderdiń janynda jańa zamanaýı kitaphanalar ashylady.
«Qazirgi kitaphana – bul jaı ǵana kitap sóreleri emes, ol – qarym-qatynas pen ózin-ózi damytýǵa arnalǵan ıntellektýaldy keńistik», – dep atap ótti Mádenıet basqarmasynda.
Jyl sońyna deıin Observatorium murajaıy ashylyp, «Raıymbek batyr» murajaı kesheniniń qurylysy aıaqtalady.
Sondaı-aq, saq mádenıeti ortalyǵyn, Jastar teatryn qurý jáne 2030 jylǵa deıin qala boıynsha 20 jańa kitaphana ashý josparlanyp otyr.