Almaty ákimi Darhan Satybaldy aqaýsyz jáne qatty zaqymdanbaǵan jıektastar men asfáltty aýystyrýǵa qatysty eskertý jasady, - dep habarlaıdy Aqshamnews.kz.
Darhan Satybaldy Bostandyq aýdanyndaǵy jobalardyń júzege asý barysyn tekserdi:
Nazarbaev dańǵyly men Gandı kóshesiniń qıylysyndaǵy skverdiń jalpy aýmaǵy 4,16 ga. Qazirgi ýaqytta toǵan salynyp, uńǵymalar burǵylanyp, ınjenerlik jeliler tartylyp jatyr. Ákim kógaldandyrýǵa erekshe kóńil bólýdi tapsyrdy.
Ál-Farabı dańǵyly boıyndaǵy Esentaı ózenindegi kópirdi jańartý jumystary 60% aıaqtalǵan. Jumystar jasyl jelekti saqtaý úshin ýaqytsha toqtatylǵan, jobaǵa tıisti ózgerister engizilgen. Ákim nysannyń qurylysy merziminde aıaqtalyp, jaǵalaý aımaǵynyń kórkemdik kelbeti saqtalýǵa tıis ekenin eskertti.
1 500 oryndyq mektep qurylysy – árleý jáne kórkeıtý jumystary júrgizilip jatyr. Oqý jıhazdary jetkizilgen. Mektep jańa oqý jylynda paıdalanýǵa beriledi.
Toraıǵyrov kóshesi boıyndaǵy jaıaý júrginshiler aımaǵy – HQB aıasynda jasalǵan. Jumys qazan aıynda aıaqtalady. Aýmaq kógaldandyrylyp, trotýarlar, velojoldar, sport jáne balalar alańdary jańartylyp, jaryqtandyrý júıesi júrgiziledi.
Gagarın dańǵylynda (Jandosov — Abaı aralyǵy) kórkeıtý jumystary aıaqtaldy. Jańa oryndyqtar qoıylyp, jaryq shamdary ornatylǵan, sport alańdary men sýarý júıeleri qalpyna keltirilgen.
Sóz sońynda qala ákimi aqaýsyz jáne aıtarlyqtaı búlinbegen asfáltty aýystyrýǵa baılanysty oıyn aıtyp, mundaı jumystar shynymen de qajettilik týyndaǵan kezde ǵana júrgizilýi kerektigin jaýapty tulǵalarǵa qatań eskertti.