Almaty ákimi Darhan Satybaldy Google korporasıasynyń Eýropa men Ortalyq Azıadaǵy bilim berý baǵytyna jáne EMEA óńirindegi joǵary bilim salasyna jetekshilik etetin Anna Artemeva hanymmen resmı kezdesý ótkizdi.
Kezdesý barysynda qala mektepteriniń bilim berý júıesine sıfrlyq quraldardy engizý máseleleri talqylandy.
Darhan Satybaldy sıfrlyq tehnologıalardyń qoǵam damýyndaǵy, ásirese jas urpaq tárbıesindegi mańyzyn erekshe atap ótti.
«Sıfrlandyrý – bul jaı ǵana ınfraqurylymdy jańartý emes, bul bilim berýdegi kózqarasty túbegeıli ózgertý. Ol oqýshylardyń synı oılaýyn, sıfrlyq saýattylyǵyn arttyryp, jasandy ıntellekt pen bultty tehnologıalardy meńgerýge jol ashady», – dedi ákim.
Almatyda Google for Education platformasynyń pılottyq jobasy sátti júzege asyp, onyń aıasynda qalanyń barlyq mektebindegi muǵalimder oqýdan ótti. 2025 jyly qyrkúıek aıynan bastap Google for Education Fundamental Plus dep atalatyn platformanyń jańa, keńeıtilgen nusqasy engiziledi. Joba 18 myńnan astam muǵalimdi jáne 9-10 synypta oqıtyn 20 myńnan asa oqýshyny qamtıdy.
«Google kompanıasynyń bilim berý salasyndaǵy sheshimderi qalanyń oqý júıesin sıfrlyq turǵyda jańǵyrtýda erekshe ról atqarady», – dedi Darhan Satybaldy.
Kezdesýde aldaǵy ýaqytta ashylatyn Gemini Academy Almaty jobasyna da aıryqsha mán berildi. Bul halyqaralyq deńgeıdegi sıfrlyq bilim ortalyǵy bolmaq. Munda ustazdar men oqýshylar jasandy ıntellekt, mashınalyq oqytý, bultty tehnologıa syndy zamanaýı baǵyttar boıynsha bilim alyp, daǵdysyn damyta alady. Akademıa EdTech jáne sıfrlyq saýattylyq salasyndaǵy jetekshi bastama retinde tanylyp, Qazaqstan men búkil Ortalyq Azıa óńirine sıfrlyq pedagogtardy daıarlaıtyn ortalyqqa aınalmaq.
Sondaı-aq, kezdesýde sıfrlyq qaýipsizdik, muǵalimderdiń kásibı damýy, jasandy ıntellektti oqý úderisine engizý jáne oqýshylardyń oqý belsendiligin taldaý quraldaryn qoldaný syndy máseleler de talqylandy.
Anna Artemeva Almaty ákimdiginiń joǵary deńgeıdegi yntasyn atap ótip, aldaǵy ýaqytta da seriktestikti nyǵaıtýǵa ázir ekenin jetkizdi.
Kezdesý sońynda taraptar ortaq bilim berý bastamalaryn birlese júzege asyrýǵa jáne Almatydaǵy sıfrlandyrý tájirıbesin keńeıtýge ózara qyzyǵýshylyq bildirdi.