Almaty ákimi Darhan Satybaldy Ulybrıtanıanyń jetekshi oqý oryndarynyń biri – Coventry University-men seriktestikti damytý, Almatyda ınjenerlik kampýs ashý máselesine arnalǵan kezdesý ótkizdi, - dep habarlaıdy Aqshamnews.kz tilshisi.
Kezdesýge Coventry University prorektory, kásipkerlik jáne ınovasıalar jónindegi maman Pol Nýn, Primus Education prezıdenti Alıster Bartolomú jáne Coventry University Kazakhstan prezıdenti Mıras Dáýlenov qatysty.
Coventry University Kazakhstan – Qazaqstanda resmı túrde ashylǵan alǵashqy sheteldik ýnıversıtetterdiń biri. Ýnıversıtettiń alǵashqy kampýsy 2024 jyly Astanada ashylǵan. Qazirgi tańda onda 360-tan astam stýdent bilim alyp jatyr. Oqý tolyqtaı aǵylshyn tilinde júrgiziledi, al oqytýshylar quramy Ulybrıtanıadan kelgen mamandardan turady.
Kezdesý barysynda Darhan Satybaldy Memleket basshysy ǵylymdy damytýǵa, ozyq tehnologıa men ınovasıalyq sheshimderdi engizýge aıryqsha kóńil bólip otyrǵanyn atap ótti.
«Almaty tek qarjylyq jáne iskerlik hab qana emes, sonymen qatar ǵylymı-bilim berý ortalyǵy retinde de qarastyrylady. Resmı statısıka boıynsha qalada shamamen 2,5 mıllıon adam turady, onyń 30%-dan astamy – jastar. 200 myńnan astam stýdent 35-ten astam joǵary oqý ornynda bilim alyp jatyr», – dedi ákim.
Josparǵa sáıkes, Coventry University Kazakhstan Almatynyń bıznes-qoǵamdastyǵymen, qalalyq qurylymdarmen jáne bilim berý mekemelerimen strategıalyq áriptestik ornatýdy kózdeıdi. Negizgi maqsat – eńbek naryǵynda suranysqa ıe mamandar daıarlaý jáne qalanyń tehnologıalyq damýyna qoldaý kórsetý.
Osy maqsatta ýnıversıtet Almatyda ınjenerlik kampýs ashýdy josparlap otyr. Ol mashına jasaý, elektr energetıkasy, atom energetıkasy jáne qurylys salalary boıynsha mamandar daıyndaýǵa basymdyq beredi.
«Bizdiń maqsatymyz – eldiń negizgi salalarynyń damýyna úles qosa alatyn bilikti mamandar daıarlaý. Oǵan aqparattyq tehnologıa, qarjy, bıznes jáne kásipkerlik te kiredi. Biz tek Astana emes, búkil Qazaqstan eńbek naryǵynyń suranysyna beıimdelgen baǵdarlamalar usynamyz. Almaty – jas ári daryndy mamandarǵa turaqty suranysy bar, áleýeti joǵary megapolıs», – dedi Coventry University Kazakhstan prezıdenti Mıras Dáýlenov.
Kezdesý sońynda Darhan Satybaldy qala ákimdigi bilim berý ortasyn damytýǵa baǵyttalǵan jobalarǵa ashyq ekenin jáne olardy jan-jaqty qoldaýǵa daıyn ekenin aıtty.