Polısıa áýleti: áke jolyn jalǵaǵan tártip saqshysy
Otbasyndaǵy dástúr – urpaqtar sabaqtastyǵynyń berik tiregi. Ásirese, bul tártip saqshysy mamandyǵynda erekshe mańyzǵa ıe. Sebebi qyzmetke adaldyq, ar-namysty bıik ustaý, kásibı mindetke beriktik – bul saladaǵy basty qundylyqtar. Osyndaı asyl murany jalǵap kele jatqan polıseılerdiń biri – polısıa podpolkovnıgi Darhan Ábdikárimov. Onyń bul qyzmetke kelýi – áke jolynyń zańdy jalǵasy ispetti.
Áke joly – ónege
Podpolkovnık Darhan Ábdikárimovtyń ákesi Bahadır Ábdikárimov ishki ister organdaryndaǵy qyzmetin 1984 jyly bastaǵan. Alǵashqy eńbek jolyn Ońtústik Qazaqstan oblysy İİD-niń patrúldik polısıasynda bastaǵan ol, 1989 jyldan bastap Jambyl oblystyq İİD-niń krımınaldyq qyzmetinde abyroımen eńbek etti. Kásibı biliktiligimen qatar, óziniń tabandylyǵy, adaldyǵy, shynaıy otansúıgishtigimen de daralanǵan. Ol İİO ardageri retinde Jambyl oblysy İİD Esirtki bıznesine qarsy kúres basqarmasynyń bólim bastyǵy qyzmetinen 2010 jyly podpolkovnık sheninde qurmetti demalysqa shyqty.
Balalyq arman – sanaly tańdaý
Darhan Ábdikárimov bala kúninen ákesine eliktep ósti. Ásirese, bala kúninde ákesiniń formasyna qatty qyzyqqan eken. Onyń óz isine degen súıispenshiligi men qoǵam aldyndaǵy jaýapkershiligin kórip ósken ózi de keıin bul mamandyqty óz erkimen tańdady. 2010 jyly Zań ýnıversıtetin aıaqtap, Taraz qalalyq İİB tergeý bóliminde qyzmet jolyn bastaıdy. 2013 jyldan 2022 jylǵa deıin Jambyl oblystyq Uıymdasqan qylmysqa qarsy kúres basqarmasynda jedel ýákil bolyp jumys istedi.
Búginde onyń ishki ister organdaryndaǵy eńbek ótili – 15 jyl. Osy ýaqyt aralyǵynda polısıa podpolkovnıgi retinde túrli marapattar men alǵys hattarǵa ıe bolǵan. Dese de, Darhan myrza úshin eń úlken marapat – ol onyń otbasy.
Ósip-óngen janusy - ata-anasynyń qoldaýy erekshe bolǵan. Ásirese, anasy Gúljamaldyń artqan senimi men qamqorlyǵy ákesi úshin de, ózi úshin qatty seziletin. Bir ókinishtisi, anasy ótken jyly mezgilsiz ómirden ótken. Jalǵyz uly ári maqtanyshy - Darhannyń amandyǵy men jetistigin tilegen ákesi qasynda.
Otbasy – rýhanı tirek
Mamandyq tańdaýda qatelespegen Darhan myrzanyń jar tańdaýda da joly bolǵan. Búginde onyń qarbalas jumysyna túsinistikpen qarap, balalardyń tárbıesimen aınalysyp otyrǵan jubaıy - Ásıa jan-jaqty qoldaý kórsetip keledi. Jumysta jetistikke jetýim de osy jandardyń arqasy deıdi ol.
"İshki tyl árdaıym mańyzdy, ásirese qaýip-qaterge toly quqyq qorǵaý salasynda otbasyń úshin alańdamaı júrý úshin ómirlik serigińniń senimdi, adal bolǵany mańyzdy. Otbasy – ár adamnyń berik qamaly. Aýyr kúnderdiń artynda jaqynyńnyń jan jylýyn seziný – baǵa jetpes baılyq. Sol úshin de men otbasymnyń qoldaýyna árdaıym rızamyn", – deıdi podpolkovnık.
"Uldaryńyz da siz sıaqty áke jolyn qýsa, qalaı qaraısyz"? - degen zańdy saýalǵa:
"Balalardyń biri ákem sıaqty polısıa qyzmetkeri bolamyn dep júr. Biraq áli bala ǵoı. Bolashaqta tańdaýy osy sala túsip jatsa, joq dep qolyn qaqpaımyz. Biraq ishteı onsha qalamaımyn. Sebebi, jumys jumys óte aýyr, jeke ómirge ýaqyt joq", - dep jaýap berdi.
Qoǵamǵa qyzmet – basty paryz
2022 jyly Darhan otbasymen birge elordaǵa qonys aýdardy. Búginde ol Astana qalasy PD Uıymdasqan qylmysqa qarsy kúres basqarmasyndaǵy Adam saýdasyna qarsy kúres bóliminde asa mańyzdy ister boıynsha jedel ýákil qyzmetin atqaryp júr. Qyzmet barysynda ondaǵan qylmysty ashyp, talaı taǵdyrdyń ádilettilikke qol jetkizýine sep bolǵan.
– Ákemmen árdaıym maqtanamyn. Onyń qoǵamǵa paıda ákeletin qyzmetin kórip ósken soń, men de sol joldy tańdaǵym keldi. Ata-anama óz jolymdy tańdaýǵa múmkindik bergeni úshin, árdaıym qoldaý kórsetkenderi úshin alǵysym sheksiz, – deıdi Darhan Ábdikárimov.
Darhan Ábdikárimovtyń ómirde túıgeni - adam qaı jerde qyzmet etse de, jumysty tıanaqtap istese, bári baǵalanady. Ar aldynda da jany taza bolady. Otanǵa adal qyzmet - ol úshin qyzmettegi basty qundylyq. Qaýipti qyzmetti tańdaı otyryp, ol kún saıyn adamdardyń tynyshtyǵy men qaýipsizdigi úshin eńbek etip keledi. Búginde tártip saqshysynyń basty armany - elge adal qyzmet etý arqyly balalaryna da izgilik pen ádilet jolyn úıretý. Ol úshin otbasynyń senimi - berik tirek, al áke joly - myzǵymas baǵdar.
Darhan sıaqty ulandar kóbeıse, el irgesi de, halyq senimi de nyǵaıa túseri anyq.