Osydan birneshe kún buryn ál-Farabı dańǵyly boıymen kele jatyp, ınstıtýt pedıatrıa aıaldamasynda turǵan avtobýsty kózim shaldy. Jaqyndaǵanda baıqadym kólik júrgizýshisi joq. Jol ortasynda júrgizýshisiz qoǵamdyq kóliktiń júrgizýshisi qaıda ketýi múmkin. İshinde halyq otyr. Sóıtsem, álgi júrgizýshi aıaldama artyndaǵy taldardyń tasasynan shyǵyp keledi. Kóshede qoǵamdyq dárethana bolmaǵan soń dáretke otyrǵanyn túsindim. Óz is-áreketi úshin uıalǵanyn bildirgendeı kópshilikke kúlip qoıady.
Bul jerde kólik júrgizýshisiniń esh kinási joq. Ol amalsyzdan sol áreketke bardy. Óıtkeni qalada qoǵamdyq dárethana joq. Bul kúnderi jol jaǵasyndaǵy kafe, dúken degenderiń dárethanaǵa kirýge ruqsat bermeıdi. Olardyń da esebi durys. Óıtkeni syrttan kelgen adamdardyń barlyǵyna ruqsat bre berse keshke deıin qanshama shyǵyn keledi.
Bir-eki jyl buryn Almatyda halyq kóp jınalatyn jerlerde (saıabaqtarda, bazar mańynda, t.b.) ornalasqan qoǵamdyq dárethanalar paıda boldy. Buqaralyq aqparat quraldary naqty mekenjaılardy jarıalap, ınstallásıanyń bastamashylary Visit Almaty jigitteri ekenin jazǵan.
Tipti 20 ájethananyń smetalyq quny da jarıalandy – 178,5 mıllıon teńge (1 dárethanaǵa shamamen 6,5 mıllıon teńge). Buqaralyq aqparat quraldary dárethanalarda jylý bolatynyn, sýdy jylytýǵa arnalǵan qazandyqtar, vandalızmge qarsy ýnıtazdar, rakovınalar, qol keptirgishter, sabyn salǵysh jáne t.b. ornatylady dep boljady.
Jaǵdaıdy sol kezde qalalyq týrızm basqarmasy basshysynyń orynbasary Marlen Maralov:
- Mundaı dárethanalarǵa suranys bar. Qala turǵyndary men qonaqtarynyń usynysy bolǵan. Dárethananyń baǵasy kompanıalardyń komersıalyq usynystary negizinde jasaldy. Bul somaǵa dárethana modýlin jasaý, qurastyrý, jetkizý quny men santehnıkalyq quraldarynyń baǵasy kiredi. Dárethanalarda jeldetkish, jylytý, syrtqy baqylaý kameralary ornatylǵan. Sondaı-aq múmkindigi shekteýli jandar úshin de tıisti talaptar eskerilgen, - degen bolatyn.
Shynymen quny shamamen 6,5 mıllıon teńge turatyn dárethanalar istep tur ma? Buǵan arnaıy kóz jetkizip qaıttyq.
Saıran kóliniń mańyndaǵy dárethana esigin asha almaǵan áıelder avtovokzalǵa bet túzedi. Al Áýezov atyndaǵy Akademıalyq drama teatrynyń janyndaǵy dárethananyń úsh esiginiń bireýi ǵana ashyq. Biraq, ishinen jyly sý nemese jeldetkish taba almadyq. Qystyń kúni tabıǵı jeldenip turǵan terezeni japsańyz ishinde tunshyǵyp qalý qaýpi bar ekenin de aıta ketken jón bolar. Al Baıtursynov saıabaǵyndaǵy qoǵamdyq dárethananyń esigin qansha ashamyz degenimizden túk shyqpady.
Nelikten osy ájethanalarǵa qyzmet kórsetetin adamdardy jumysqa alyp, búdjette aldyn ala qarajat tóleý qarastyrylmaǵan? (Olar tazalyqty, dárethananyń jumysqa jaramdylyǵyn baqylap otyrýy kerek).
Almatyda týrısik maýsym bastaldy. Al, sanıtarlyq torap dep atalatyn bul nysan qala turǵyndary men qonaqtaryna esigin jaýyp alyp ashar emes...