Sáýir aıynda Aýyl sharýashylyǵy daqyldarynyń seleksıasy men tuqym sharýashylyǵy salasyn damytýdyń 2024 – 2028 jyldarǵa arnalǵan keshendi jospary qabyldanady, dep habarlaıdy Almaty-akshamy.kz QazAqparatqa silteme jasap.
Senat depýtattarynyń saýalyna joldaǵan jaýabynda Premer-Mınıstr Álıhan Smaıylov osyndaı málimet keltiredi.
«Aýyl sharýashylyǵy daqyldarynyń seleksıasy men tuqym sharýashylyǵy salasyn damytýdyń 2024 – 2028 jyldarǵa arnalǵan keshendi josparynyń jobasy 3 bólimnen turady: agrarlyq ǵylymdy, seleksıany jáne bastapqy tuqym sharýashylyǵyn damytý; tehnıka men jabdyqty jańartý jónindegi sharalar; tuqym sharýashylyǵynyń tıimdi júıesin qurý, sondaı-aq jarǵylyq kapıtaldy ulǵaıtý, tuqymdardy sertıfıkattaý júıesin engizý arqyly seleksıalyq mekemelerdi materıaldyq-tehnıkalyq jaraqtandyrýǵa búdjet qarajatyn bólý jónindegi is-sharalar engizilgen.Qazirgi tańda keshendi jospar múddeli memlekettik organdar men uıymdardyń maquldaýynan ótýde. Sonyń qorytyndysy boıynsha osy jospardy sáýir aıynda bekitý josparlanyp otyr», - dep jazady Álıhan Smaıylov.
Úkimet basshysynyń málimeti boıynsha, keshendi jospar otandyq tuqym sharýashylyǵynyń básekege qabilettiligin arttyrýǵa jáne ımportqa táýeldilikti tómendetýge, sondaı-aq salaǵa ınvestısıalar men ozyq ınovasıalyq sheteldik tehnologıalar men seleksıa men tuqym sharýashylyǵynyń ádisterin tartýǵa múmkindik beredi.
«Sonymen qatar, ǵylymı zertteýlerdi baǵdarlamalyq-nysanaly qarjylandyrý sheńberinde aýyl sharýashylyǵy daqyldarynyń seleksıasyn damytý maqsatynda aýyl sharýashylyǵy daqyldarynyń seleksıasyna bólingen qarajat kólemi ulǵaıtyldy. 2024 – 2026 jyldary 5 ese (1,5 mlrd teńgeden 7,5 mlrd teńgege deıin)», - dep jazylǵan Premer-Mınıstrdiń jaýabynda.