Búgin, 15 maýsymda SHQO ákimi Danıal Ahmetovtiń ókilettigi aıaqtalady.
Oblystyq máslıhattyń baspasóz qyzmetiniń habarlaýynsha, erteń depýtattardyń jınalysy bolady. Onda jańa ákimdi taǵaıyndaýǵa kelisim berý rásimi ótedi.
Shyǵys Qazaqstan oblysy elimiz úshin strategıalyq mańyzdy aımaq. Soltústigi Reseı, shyǵysy Qytaı memleketterimen shekaralas. Sondyqtan óńirge eldiń áleýmettik-ekonomıkalyq jaǵdaıynan habary bar, sharýashylyq jáne dıplomatıalyq qabileti kúshti basshy kerek.
Aımaqta qordalanǵan túıtkilder kóp. Byltyr Rıdderdegi JES-da bolǵan apat aımaqtyń energetıka salasy aqsap turǵanyn kórsetti. Odan bólek ekologıalyq apat, joldardyń jaǵdaıy sıaqty máseleler de bar. Ásirese, Abaı oblysynda bolǵan órttiń búkil óńir ekologıasyna qalaı áser etetini týraly eshkim dóp basyp aıta almaıdy. Osy jáne ózge de túıtkilderdiń áli kúnge deıin sheshimin tappaǵanyn eskersek, qazirgi oblys ákimi Danıal Ahmetovtyń óz ornyn saqtap qalýy ekitalaı.
Oblysty 9 jyl basqarǵan Danıal Ahmetovtyń qazirgi jaǵdaıy aýyr. Saıası salmaǵy tómendegen. Ákimderdiń jumysyn zertteıtin «STRATEGIA» áleýmettik-saıası zertteý qorynyń sońǵy reıtıńinde Danıal Ahmetov ákimder arasynda eki jyl qatarynan kósh sońynda qalyp qoıdy.
Biraq ázirge aımaqqa kim basshy bolatyny týraly resmı aqparat joq. Bizdiń boljamymyz boıynsha, Ermek Kósherbaev, Darhan Qaletaev nemese Altaı Kúlginov aımaq tizginin ustaýy múmkin.
Altaı Kúlginovti bul tizimnen alyp tastaýǵa da bolady. Sebebi ol vıse-premerlik qyzmetten qoǵamda bolǵan daý tusynda ketti. Sarapshylar onyń qyzmetten ketýin Astanada oryn alǵan sý tapshylyǵymen baılanystyrady. Mamandardyń pikiri boıynsha sý tapshylyǵyn ol Astanada ákim bolǵan kezde sheshe almaǵan. Al onyń sý máselesi órship turǵan aımaqqa ákim bolýy otqa maı quıǵanmen birdeı.
Kelesi úmitker Qazaqstannyń Ýkraınadaǵy elshisi Darhan Qaletaev. Darhan myrzanyń osy aımaqtyń tizginin ustaýy múmkin degen sybys byltyr da boldy. Biraq qazir Qazaqstan úshin Ýkraına baǵytynda atqaratyn jumys jetkilikti. Sondyqtan bul úmitker de basshylyqqa kelmeıdi dep boljap otyrmyz.
Qoldanystaǵy zańnamaǵa sáıkes, Memleket basshysy depýtattarǵa eki úmitkerdi usynady. Al Qasym-Jomart Toqaevtyń barlyq kadrlyq taǵaıyndaýlaryn saraptaıtyn bolsaq, dıplomatıalyq qyzmette tájirıbesi bar azamattarǵa senim artqanyn kóremiz. Osy turǵydan qaraıtyn bolsaq, aımaqqa Ermek Kósherbaev ákim bolýy múmkin.
Sebebi ol 1988 jyldan beri Syrtqy ister mınıstrligi qurylymynda jumys istep keledi. Aımaqta jumys isteý tájirıbesi de bar. 2010-2014 jyldary SHQO ákiminiń orynbasary qyzmetin atqarǵan. Onda ol ındýstrıalandyrý máselelerimen aınalysty. Sondyqtan energetıka, iri ónerkásip taqyryptarymen tanys.
Sonymen qatar, 2022 jyly oblysta reseılik kapıtaly bar kompanıalar sany 17%-ǵa ósti. Bul álemdegi geosaıası jaǵdaı nasharlaǵan ýaqytta mańyzdy máselege aınalyp otyr. Sondyqtan jańa basshyǵa osy baǵytta da jumys isteýine týra keledi.