Reseı Eýrazıalyq ekonomıkalyq odaqqa múshe elderge dándi daqyldar men qant eksportyna ýaqytsha tyıym salmaq dep habarlaıdy Almaty-akshamy.kz
Boljam boıynsha, shekteý sharalary 31 tamyzǵa deıin kúshinde bolady. Ekonomıkalyq damý mınıstrliginiń habarlaýynsha, bul sheshim eldiń azyq-túlik qaýipsizdigin qamtamasyz etý úshin qabyldanyp otyr.
Bıliktiń bul usynysy 17 naýryzda ótetin Eýrazıalyq ekonomıkalyq komısıanyń otyrysynda qarastyrylmaq. Aýylsharýashylyq mınıstrliginiń málimeti boıynsha, qazir Reseı dándi daqyldarmen 150 paıyzǵa qamtamasyz etilgen.
Aıta keteıik, Reseıde sońǵy bir aptanyń ishinde bıdaıdyń baǵasy 40 paıyzǵa qymbattaǵan. Mundaı rekordtyq ósim sońǵy 14 jylda bolmaǵan deıdi sarapshylar. Al Bloomberg agenttiginiń málimetine sáıkes, Ýkraınadaǵy áskerı qaqtyǵys álemdik bıdaı eksportynyń tórtten bir bóligin qysqartyp tastaǵan.