Qazaqstan Prezıdenti Qasym-Jomart Toqaev 2022 jyldyń 1 qyrkúıeginde «Ádiletti memleket. Birtutas ult. Berekeli qoǵam» atty kezekti Joldaýynda elimizdiń ekonomıkalyq saıasatynyń sapaly damýyna, memlekettik basqarý isiniń qaıta jańǵyrýyna, sonymen qatar ónerkásip, bilim men ǵylym, otandyq bıznes salalarynyń da ózekti de mańyzdy máselelerine toqtaldy.
Memleket basshysy Qazaqstan halqyna arnalǵan Joldaýynyń negizgi bóliginde elimizdiń áleýmettik-ekonomıkalyq damý jolyna basymdyq bere otyryp, «Jańa ekonomıkalyq saıasat», «Naqty sektordy damytý», «El bolashaǵyna arnalǵan strategıalyq ınvestısıa», «Memlekettik basqarý isin qaıta jańǵyrtý», «Zań jáne tártip» sekildi bes naqty baǵdarǵa bólgen.
Prezıdent óz Joldaýynda halyqtyń ál-aýqatyn arttyrýdy alǵa tarta otyryp, jańa ekonomıkalyq baǵdardyń basty baǵyty retinde jeke kásipkerlik bastamalardy yntalandyrýdy, barlyq adamdarǵa birdeı múmkindik berý arqyly básekelestikti damytýdy, sonymen qatar, ulttyq tabysty ádil bólý sekildi kezek kúttirmeıtin basty mindetterdi atap ótti. Sonymen qatar, Memleket basshysy kókeıkesti másele retinde ulttyq qordyń qarjysyn tıimsiz jumsaý toqtatylatyny jaıynda: «Ulttyq qordyń qarjysyn tıimsiz jumsaý toqtatylady. Bul – óte ózekti másele. Qordyń qarajatyn asa qajet ınfraqurylymdy damytýǵa jáne elimiz úshin mańyzy zor jobalardy qarjylandyrýǵa jumsaımyz», – dep, Ulttyq qordyń basty qyzmeti men ony utymdy paıdalaný jolyn qadap aıtty.
Joldaýdyń «El bolashaǵyna arnalǵan strategıalyq ınvestısıa» atty úshinshi baǵdarynda elimizdiń basty qundylyǵy retinde adam kapıtalyna erekshe baǵa berilgen. Bul baǵdarda qoǵamnyń ornyqty damý jolyndaǵy ult saýlyǵyna, ıaǵnı densaýlyq saqtaý salasyna basa mán berý kerektigi saralanady. Búgingi tańdaǵy saqtandyrý júıesiniń tıimdiligi tómendep, kópshilik halyqtyń medısınalyq qyzmetti tolyq kólemde ala almaı otyrǵan kemshilikterdiń keleli tustaryn synǵa aldy. Atalǵan olqylyqtardyń aldyn alý negizinde erikti medısınalyq saqtandyrý júıesin engizý máselesin kóterdi. Prezıdent Úkimetke densaýlyq saqtaý salasyn jáne jalpy áleýmettik salany qarjylandyrý júıesin qaıta qaraýdy naqty tapsyrdy.
Bilim berý júıesi qoǵamnyń áleýmettik-ekonomıkalyq mańyzdylyǵyn arttyrýda jetekshi ról atqaratyny barshamyzǵa málim. Sol sebepti, Q.K.Toqaev ult sapasyn jaqsartýǵa jańa qadam retinde bilim salasynyń ereksheligine basymdyq beredi. Tabysty ult bolýdyń taǵy da mańyzdy sharty retinde – orta bilimniń sapasyna basty nazaryn aýdarady. Árbir oqýshynyń bilim alyp, jan-jaqty damýy úshin qolaıly jaǵdaı jasalýy tıistigin saraptap, osy negizde «Jaıly mektep» ulttyq jobasy qolǵa alynatyndyǵy jaıly utymdy oılarymen bólisti.
Joldaýda jastarǵa jan-jaqty qoldaý kórsetýdi – memleketimizdiń basty mindeti retinde qarastyrýdy basa aıtty. Jalpy, jastardy qoldaýǵa erekshe basymdyq berilip, osy baǵytta kóptegen jobalardyń iske asyrylýy kózdelip otyr. Munyń basty aıǵaǵy retinde eńbekpen qamtıtyn túrli sharalar arqyly kelesi jyldan bastap 100 myń jastyń jumyspen ornalasýyna múmkindikterdiń týyndaıtyny, jastarǵa jeńildetilgen tártippen jyldyq ósimi 2,5 paıyz bolatyn shaǵyn nesıe beriletindigi jaıly aıtyldy. Jastar máselesine qatysty aıtylǵan aýqymdy jobalaryna júıeli sharalar qabyldanyp, óz ýaqytynda júzege asyrylady degen senimmen qaraımyz.
Memleket basshysynyń ádiletti Qazaqstandy qurý jolyndaǵy kótergen negizgi bastamalary men salmaqty oılary memleketimizdiń órkendep damýyna tyń serpin berip qana qoımaı, jańa múmkindikter men qoǵamdyq mańyzdy maqsattarǵa jol ashatyny anyq. Prezıdent Joldaýynda kóterilgen túıindi máseleler júıeli túrde ári der kezinde oryndalatyn bolsa, qazaqstandyqtardyń ál-aýqaty artatyny ras. Ult múddesi men jarqyn bolashaqqa nyq qadam basý jolynda elimizdiń árbir azamaty «jumylǵan judyryqtaı» berik yntymaqtastyqta bıik belesterdi birlesip atqarýdy umytpaǵany abzal. Jańa Qazaqstannyń jańarýy men jańǵyrý jolynda jasalynyp jatqan júıeli reformalar el órkendeýiniń berik negizi bolady dep úmit artamyz.