Chehıalyq ınvestor Qazaqstanda detonator shyǵarmaq nıette.
Bul týraly KAZAKH INVEST ulttyq kompanıasymen kezdesýde Austin Detonator kompanıanyń aımaqtyq dırektory Lıbor Bartek aıtty, dep habarlaıdy Almaty-akshamy.kz.
Austin Detonator ókilderiniń aıtýynsha, qazaqstandyq naryq kompanıa úshin úlken qyzyǵýshylyq týdyrýda jáne ózgergen halyqaralyq jaǵdaıǵa baılanysty olar yntymaqtastyqty keńeıtý jáne Qazaqstanda zaýyt ashý múmkindikterin qarastyrýda.
«Bizde buryn qazaqstandyq kompanıalarmen jumys isteýdiń tabysty tájirıbesi bar. Qazir biz kompanıanyń qazaqstandyq naryqtaǵy úlesin arttyrýǵa múddeli ekenimizdi bildiremiz. Yntymaqtastyǵymyzdy keńeıtý úshin zaýyt ashýdy josparlap otyrmyz, ol tek qazaqstandyq naryqty ǵana emes, sonymen qatar basqa elderdiń naryqtaryna eksporttaıdy», - dedi Lıbor Bartek.
«Sizderdiń kásiporyn ónimderiniń 97 paıyzy eksportqa shyǵarylatynyn bilemiz. Óndiristerdi Qazaqstanda ornalastyrý arqyly siz taýardy jetkizý tizbegin jaqsarta alyp jáne de jańa naryqtarǵa shyǵa alatynyna senimdimiz», -dep atap ótti basqarma tóraǵasynyń orynbasary Jandos Temirǵalı.
Austin Detonator (Austin Powder Company holdıńiniń bóligi) - Eýropadaǵy ónerkásiptik jarylys jumystaryna arnalǵan detonasıalyq materıaldardyń eń iri óndirýshisi. Ónimder jelisi alýan túrli jáne munaı-gaz ónerkásibine arnalǵan elektrlik/elektrlik emes jalpy maqsattaǵy detonatorlardy, elektrondy júıelerdi, sondaı-aq detonasıalyq materıaldardy óndirýge arnalǵan komponentterdi: praımerlerdi, tolqyn ótkizgishterdi, tutaný bastıekterin jáne t.b. óndiredi. Austin Europe kompanıasynyń ýropalyq aımaqta 12 ókildigi, jalpy sany 1000-nan astam qyzmetkeri bar. Kompanıa búkil álem boıynsha ónimderdi jetkizedi jáne jarylys, tehnıkalyq qoldaý jáne jarylys jumystaryn ońtaılandyrý qyzmetterin usynady.
Austin Detonator ókilderiniń sapary KAZAKH INVEST pen Qazaqstannyń Chehıadaǵy Elshiliginiń qoldaýymen uıymdastyryldy.