Bul týraly Almaty qalasy Almaly aýdany ákiminiń orynbasary Sapar Nurashev Óńirlik komýnıkasıalar qyzmetiniń brıfıńinde málimdedi, dep habarlaıdy Almaty-akshamy.kz.
«Áleýmettik mańyzy bar taýarlar baǵasynyń negizsiz ósýine jol bermeý maqsatynda apta saıyn Masanchı kóshesinde Áıteke bı kóshesinen Gogol kóshesine deıin «Demalys kúni» jármeńkeleri ótkiziledi. Jármeńkege Almaty oblysynyń (Qarasaı aýdany) 90-nan astam sharýa qojalyqtary men aýdan kásipkerleri qatysýda», - dedi S.Nurashev.
Ol ótken kezeńde jármeńkedegi baǵa turaqty, ortasha alǵanda naryqtyq baǵadan 10%-ǵa tómen bolǵanyn atap ótti. Turǵyndardy qamtý 35% quraıdy.
Sondaı-aq, Jibek joly kóshesinde Seıfýllın dańǵyly men Naýryzbaı batyr kóshesiniń aralyǵynda ár aıdyń sońǵy demalys kúnderi halyqaralyq sheberlerdi tartý arqyly qolóner jármeńkesi ótkizilip turady.
Sonymen qatar, ákim orynbasarynyń aıtýynsha, aýdandaǵy saýda oryndarynda jáne bazarlarda ÁMAT baǵasyna apta saıyn monıtorıń júrgiziledi. Aýdanda 408 úı janyndaǵy dúken bar. Búginde 400-den astam dúken men alty bazar tekserilip, saýda ústemesiniń 15 paıyzdan aspaýynyń aldyn alý jáne túsindirý jumystary júrgizildi.
Sondaı-aq, aýdan ákimdigi usynylǵan baǵalar boıynsha taýarlardy satyp alý úshin ÁMAT jetkizý boıynsha biryńǵaı kóterme saýda operatorynyń baılanystaryn taratty.