Almaty qalasynyń Jetisý aýdanynda Jastar saıasaty basqarmasynyń qoldaýymen kezekti Career Day bos jumys oryndary jármeńkesi ótti. İs-sharaǵa belsendi jastar, aýdan turǵyndary, qoǵamdyq qaıratkerler, sondaı-aq komúnıtı-ortalyqtardyń rezıdentteri men 400-den astam kompanıanyń ókilderi qatysty.
Almaty qalasy Jastar saıasaty basqarmasynyń málimetinshe, Career Day jobasynyń basty maqsaty — jastardy jumyspen qamtýǵa jáne mansap jolyn qurýǵa múmkindik berý arqyly olardyń kásibı bolashaǵyn qalyptastyrý. Almatynyń barlyq aýdandarynda ótip kele jatqan jármeńkelerdiń alǵashqy 7 kúninde 21 myńnan astam jas qamtyldy. Olardyń qatarynda mektep, kolej jáne joǵary oqý oryndarynyń túlekteri bar.
«Bizdiń basty mindetterimizdiń biri – jastardy jumyspen qamtý jáne jan-jaqty damýyna múmkindikter ashý. Career Day – bul tek jármeńke ǵana emes, jastar arasyndaǵy jumyssyzdyqty azaıtýdyń tolyqqandy áleýmettik quraly. Osyndaı is-shara arqyly biz jastardy jetekshi kompanıalardyń ókilderimen kezdestirip, óz bolashaǵyna qadam jasaı alatyndaı múmkindik jasaımyz», — dedi Almaty qalasy Jastar saıasaty basqarmasynyń basshysy Azız Kajdenbek.
İs-shara aıasynda arnaıy keńes berý aımaqtary uıymdastyrylyp, jumyssyz jastar HR-mamandarmen tikeleı sóılesip, túıindemelerin qaldyryp, jeke keńester aldy.
«Men bul jármeńkege jaı ǵana qarap shyǵaıyn dep kelgem. Biraq qalalyq mansap ortalyǵynyń qyzmetkerleriniń kómegimen jáne usynylǵan bos oryndardyń arqasynda ózime unaıtyn jumysqa ornalastym», — deıdi jármeńke qatysýshysy Daýlet Imanov.
Aıta keteıik, 2025 jyldyń basynan beri Almaty qalasynda 9 myńnan astam jas turaqty jumysqa ornalasqan. Qalalyq mansap ortalyǵynyń qyzmetterin qalanyń kez kelgen komúnıtı ortalyǵynan paıdalanýǵa bolady.
Kelesi Career Day jármeńkesi 2025 jyldyń 30 mamyr kúni Naýryzbaı aýdanyndaǵy «Taý-Samaly» bazarynda ótedi.