2021 jyly janýarlardyń qatysýymen 109 jol-kólik oqıǵasy bolǵan
Eldimekender mańynda jol belgileri men quraldaryn urlaý tyıylmaı tur. Bul týraly «Qazaqavtojol» JSHS-niń Almaty oblystyq fılıalynyń bas ınjeneri Berik Sarqytbaev aıtty, dep habarlaıdy Almaty-akshamy.kz Baq.kz-ke silteme jasap.
Onyń aıtýynsha, jol jıegine ornatylǵan jol belgileri men qorshaýlardy, jaryqtandyrǵyshtardy halyq urlap áketedi eken.
«Jol belgileri men ózge de quraldardy adamdar úıdegi turmystyq maqsatta paıdalaný úshin urlaıdy. Biri qańyltyr belgini qazan japqysh etip paıdalansa, endi biri jol jıegindegi temir torlardy urlap áketip qora-jabdyǵyna paıdalanady. Bıyl Almaty oblysynda 350 metrli temir tor qoldy boldy. Ol janýarlardyń jolǵa shyǵyp ketpeýi úshin ornatylǵan edi», - deıdi Sarqytbaev.
«Qazaqavtojol» JSHS-niń baspasóz qyzmetiniń basshysy Adına Aınaeva byltyr respýblıka boıynsha jol belgilerin urlaýdan 60 mln teńge shyǵyn kelgenin aıtady.
«Jol belgilerin sol mańdaǵy aýyl turǵyndary turmysta qoldaný úshin alyp ketedi. Ásirese joldy bólip turatyn temir brýstardy urlap áketedi. Ol júrginshilerdiń qarsy betke ótip ketpeýi úshin saqtyq sharasy retinde ornatylǵan. Jol belgileri men quraldaryn urdaý jol qaýipsizdiginiń tómendeýine ákeledi. Janýarlardan qorǵaıtyn torlardy urlap ketkendikten maldar jolǵa shyǵyp ketedi, onyń arty jol apatyna, qaıǵyly jaǵdaıǵa jetkizedi», - deıdi ol.
Jol belgisin urlaý jaǵdaıy anyqtalǵanda arnaıy akti toltyrylyp, kináliler ákimshilik jaýapkershilikke tartylady eken.
Jol belgilerin urlaý, qoqys tastaý ár adamnyń ishki mádenıetine baılanysty. Qazir bizdiń qyzmetkerler jol boıyndaǵy eldimeken ákimdigi, ýchaskelik polıseımen birge ár úıge jekeleı kirip túsindirý jumystaryn júrgizip jatyr. Olar jol belgilerin urlaýdy saldaryn, maldaryn jol boıyna jibermeý boıynsha túsindirý jumysaryn júrgizedi.
Sonymen qatar ol maldyń jolǵa shyǵyp ketý jaǵdaılary ásirese Mańǵystaý oblysynda jıi bolatynyn jetkizdi.
«Qazir kóptegen jol-kólik oqıǵasy janýarlarmen soqtyǵysý saldarynan bolyp jatyr. Malyna ıe bolmaǵandar da azamattyq jaýapkershilikke tartylady. Maldardyń kóbiniń qulaǵynda syrǵalary bolmaıdy, sol sebepti ol kimdiki ekenin anyqtaý qıynǵa túsedi. Ol jerde adam shyǵyny da, materıaldyq shyǵyn da bolyp jatady. Tym bolmasa túngi ýaqytta maldaryn qaraýsyz qaldyrmasa deımiz. Qazir jolda maldyń kólikpen soqtyǵysýy jóninde Mańǵystaý alda tur. Sondyqtan ol jaqtaǵy aýyl turǵyndaryna túsindirý jumystary júrgizilip jatyr», - dedi Aınaeva.
Onyń aıtýynsha, 2021 jyly janýarlardyń qatysýymen 109 jol-kólik oqıǵasy bolǵan. Onyń ishinde 139 adam jaraqat alyp, 30 adam qaza tapqan. Al, 2022 jyldyń İ toqsanynda 11 jol-kólik oqıǵasy bolyp, 13 adam jaraqat alsa, 3 adam qaza tapqan.