2024 jyldyń qorytyndysy boıynsha 78,1 myń otbasyndaǵy 413,7 myń adamǵa ataýly áleýmettik kómek taǵaıyndaldy.
Osy maqsatqa búdjetten 39,5 mlrd teńge bólindi, dep habarlaıdy aqshamnews.kz.
Buryn habarlanǵandaı, AÁK-niń negizgi maqsaty – aqshalaı tólem túrinde qoldaýdy júzege asyrý jáne otbasynyń eńbekke qabiletti múshelerin jumyspen qamtýǵa járdemdesýdiń belsendi sharalaryna tartý arqyly otbasyn qıyn ómirlik jaǵdaıdan shyǵarý.
AÁK mynalardy kózdeıdi:
- tabysy kedeılik sheginen aspaıtyn azamattarǵa toqsan saıyn áleýmettik kómek taǵaıyndaý;
- tabysy az otbasylardaǵy 1 jas pen 6 jas aralyǵyndaǵy ár balaǵa 1,5 AEK mólsherinde aı saıynǵy qosymsha tólem berý. 2024 jyldyń qorytyndysy boıynsha AÁK alýshylar qatarynan mektep jasyna deıingi 129,5 myń balaǵa 5,4 mlrd. teńge somasyna qosymsha tólem taǵaıyndaldy;
- jumysqa ornalastyrý, óz isin ashýǵa nıetti otbasylarǵa granttar berý, biliktilikti arttyrý kýrstaryna jiberý (qajet bolǵan jaǵdaıda) jáne basqalar arqyly jumyspen qamtýǵa járdemdesý.
Qazirgi ýaqytta qazaqstandyqtar AÁK taǵaıyndaýǵa ótinishti turǵylyqty jeri boıynsha mansap ortalyǵynda, aýyl okrýginiń ákimine sondaı-aq Elektrondyq úkimet portaly (egov.kz) arqyly bere alady.
Esterińizge sala keteıik, QR Áleýmettik kodeksine sáıkes 2025 jylǵy 1 qańtardan bastap AÁK taǵaıyndaý úshin kedeılik shegi halyqtyń medıandyq kirisinen aıqyndalady.
Eńbek jáne halyqty áleýmettik qorǵaý mınıstrligi Ulttyq statısıka búrosymen birlesip Otbasynyń sıfrlyq kartasynyń derekteri boıynsha toqsan saıynǵy medıandyq kiris mólsherine esepteýler júrgizdi. Olardyń nátıjeleri boıynsha kedeılik shegi medıandyq kiristiń 35% deńgeıinde, biraq qazirgi deńgeıden tómen emes, ıaǵnı óńirlik eń tómen kúnkóris deńgeıiniń 70% deńgeıinde aıqyndalǵan
Kedeılik shegin anyqtaýda medıandyq kiristi engizý ataýly áleýmettik kómek mólsheriniń azaıýyna ákelmeıtinin atap ótý mańyzdy. Sonymen qatar, AÁK alýshylar sany 755 otbasyna nemese 3,8 myńnan astam adamǵa ósýi múmkin dep boljanýda.
Sonymen qatar 2025 jyldyń 1 qańtarynan bastap AÁK-ke úmitker azamattardyń shyǵystaryn esepke alý tetigin synaqtan ótkizý jónindegi pılottyq joba iske qosyldy.
Qarajat qozǵalysy týraly aqparatty jınaý ótinish berýshiden jáne onyń otbasy múshelerinen memlekettik organdar men ekinshi deńgeıdegi bankterdiń aqparattyq júıeleri arqyly kelisimdi alǵannan keıin ǵana jıyntyq túrde júzege asyrylady. Eger banktik shottar boıynsha shyǵys operasıalarynyń mólsheri kedeılik sheginen aspasa, onda AÁK qoldanystaǵy zańnamaǵa sáıkes taǵaıyndalady.