Jenevada Ortalyq Azıa elderi delegasıalarynyń kezdesýi ótti.
Basqosýda BUU Eýropalyq ekonomıkalyq komısıasy Transkaspıı halyqaralyq kólik dálizin júzege asyrý ıdeıasyn qoldady. Uıymnyń aımaq ekonomıkasyna arnalǵan arnaıy baǵdarlamasyn tıimdi damytý jóninde birlesken málimdeme qabyldandy, dep habarlaıdy Almaty-akshamy.kz 24.kz-ke silteme jasap.
Qazaqstan BUU-nyń Arnaıy baǵdarlamasyn Ortalyq Azıa ekonomıkasyn damytý úshin qoldanýdy jalǵastyrady. Elimiz jobany odan ári damytýdy qoldaıdy.
«Biz bul baǵdarlamany ulttyq bastamalar men BUU-nyń aımaqtaǵy ekonomıkalyq yntymaqtastyqty nyǵaıtýǵa baǵyttalǵan biregeı alań dep qarastyramyz. Kólik baǵyttaryn ártaraptandyrý, saýdany yntalandyrý, ınfraqurylymdy damytý, sıfrlandyrý Qazaqstan ekonomıkasynyń basty baǵyttarynyń biri bolyp sanalady», - deıdi QR Ulttyq ekonomıka mınıstri Álibek Qýantyrov.
«2022 jyl BUU Eýropalyq ekonomıkalyq komısıasy úshin ózgeristerge toly, kúrdeli jyl boldy. Biz Qazaqstannyń halyqaralyq uıym alańynda júzege asyrǵan sharalaryn joǵary baǵalaımyz. Qazaqstan tarapy Almatyda ekonomıkalyq forým men Basqarýshy Keńestiń otyrysyn óte jaqsy uıymdastyrdy. Kezdesýlerde mańyzdy sheshimder qabyldandy», - deıdi BUU Eýropalyq ekonomıkalyq keńesi atqarýshy hatshysynyń orynbasary Dmıtrıı Marásın.
Mınıstr Ázirbaıjannyń BUU-nyń arnaıy baǵdarlamasyna tóraǵalyq jasaýyna qoldaýyn bildirdi. Osy eldiń Prezıdenti Ilham Álıevtiń Qazaqstanǵa saparyna toqtaldy. Baýyrlas memleketter halyqaralyq uıym men Ortalyq Azıadaǵy bastamalaryn úılestirip otyrýǵa ýaǵdalasqanyn atap ótti.
«Qazaqstannyń kóshbasshylyǵymen aımaqta kólik, energetıka, saýda, orman jáne turǵyn úı salý salalarynda jańa yntymaqtastyq túrleri damyp keledi. Óńirde energetıkalyq seriktestikke de kóp den qoıylyp otyr. Biz Qazaqstan jáne shekaralas eldermen sýdy paıdalaný, jasyl energetıkaǵa kóshý, kómirqyshqyl gazyn shyǵarýdy azaıtý jáne kólik salasynda birlesip áreket etýge kúsh salyp jatyrmyz», - deıdi BUU Eýropalyq ekonomıkalyq keńesi atqarýshy hatshysynyń orynbasary Dmıtrıı Marásın.
Ortalyq Azıa elderiniń ókilderi basqosýda saýda, ınfraqurylymdy damytý, sıfrlandyrý jáne jasyl tehnologıa máselelerin talqylady. Saýda-ekonomıkalyq yntymaqtastyq pen uıymnyń turaqty damý maqsattaryn qarastyrdy. Kezdesý sońynda birlesken qarar qabyldandy.