Búgin Almatydaǵy Kamensk ústirtinde jarty saǵattyń ishinde jaýyn-shashynnyń qalyptan tys mólsheri jaýyp, "Esentaı moll" saýda ortalyǵyndaǵy jerasty avtomobıl týnneli sý astynda qaldy. Jaýyn shashyn kólemi ortasha aılyq normadan edáýir asty. Saǵat 18:30-dan bastap ál-Farabı dańǵylyndaǵy (J.Úshkempirov kóshesiniń qıylysy) jańbyr sýy aryq jelisine syımaı, dańǵyldyń jol bóligine qaraı arnasynan shyqty. Saǵat 19:00-den bastap nóser jaýynnyń sýy ál-Farabı dańǵylynyń jol bóligindegi kólik aıryǵynyń Shyǵys jáne Batys burylystaryna, sondaı-aq "Esentaı" SOO qarsy jerasty jaıaý júrginshiler ótkeline jaıyldy, dep habarlaıdy almaty-akshamy.kz
Almaty qalasy Polısıa basqarmasy qyzmetkerleriniń kúshimen kólik quraldarynyń qozǵalysy burylys aımaǵynda shektetildi.
Buryn sońdy bolmaǵan nóserli jaýynnan kólik aıryǵynyń sorǵy stansıasynyń avtomat qurylǵylary isten shyqty. Aıta keteıik, sorǵy stansıasy "Esentaı" SOO-nyń balansynda jáne ol qolmen qosylǵan.
Qazirgi ýaqytta sorǵylar shtattyq rejımde jumys istep jatyr. Týnelderden sý sorý jumysy qalypty jaǵdaıda júrgizilýde. Jumystarǵa qalanyń komýnaldyq qyzmetteri men Qutqarý qyzmetiniń arnaıy sý sorǵysh tehnıkasy men motopompalary qosylǵan.
Jańbyr jaýa bastaǵan sátten sý tasqynynyń aldyn alý jáne ony joıý, sýdyń kedergisiz ótýin qamtamasyz etý úshin motopompalarmen, bagrlermen jáne basqa da shans quraldarymen jabdyqtalǵan 42 jedel mobıldi brıgadanyń kezekshiligi uıymdastyryldy. Aýdan ákimdikterinde jumys óndirisin baqylaý boıynsha táýlik boıy kezekshilik uıymdastyryldy.
"Qazgıdromet" RMK boljamy boıynsha erteń tústen keıin temperatýra +29...+31 deıin kóteriledi jáne qysqa álsin álsin jańbyr jaýy yqtımal.