Qazaqstanda medısına qyzmetkerlerine jasalǵan shabýyldy polısıa qyzmetkerlerine jasalǵan shabýylmen teńestirip, sondaı jaza qoldaný qajet. Bul týraly vıse-premer Ermek Kósherbaev málimdedi, - dep habarlaıdy Aqshamnews.kz tilshisi.
Medısına qyzmetkerlerine shabýyl jasaǵandar qatań jazalanady
Úkimettegi brıfıń barysynda Kósherbaev medısına qyzmetkerlerine shabýyl jasaý máselesi qazaqstandyq qoǵamdy dúr silkindirgenimen, bul jaǵdaı burynnan bar ekenin eske saldy. Onyń aıtýynsha, on jyl buryn jedel járdem kólikteriniń jolyn bógeıtinder kóbeıe bastaǵan. Keıin bul áreketter qol jumsaýǵa deıin jetken. Sheneýnik pikirinshe, mundaı áreketke kóbine óziniki durys dep sanaıtyn adamdar barady.
"Qazir dárigerler men medbıkelerge kásibı mindetin atqarý kezinde kúsh qoldaný oqıǵalary kezdesip otyr. Memleket basshysynyń tapsyrmasyna sáıkes, biz depýtattyq korpýspen birlese otyryp, mundaı áreketter úshin qylmystyq jaýapkershilikti kúsheıtetin zańnamalyq ózgerister paketin ázirledik. Iaǵnı medısına qyzmetkerine shabýyl jasaý – qyzmettik mindetin atqaryp jatqan quqyq qorǵaý organynyń qyzmetkerine shabýyl jasaýmen teńestirilýge tıis. Bul ádiletti sheshim dep oılaımyn", – dedi Ermek Kósherbaev.
Aıta keteıik, buǵan deıin Qaraǵandyda bir pasıent jeke klınıka dárigerine shabýyl jasaǵan edi. Oqıǵa medısınalyq mekeme ǵımaratynda oryn alyp, beınejazba áleýmettik jelilerde tez tarap ketken.