Medısına qyzmetkerlerine shabýyl jasaý máselesine qatysty Qylmystyq kodekske jeke bap retinde engizilmek, - dep habarlaıdy Aqshamnews.kz tilshisi.
Bul týraly densaýlyq saqtaý mınıstri Aqmaral Álnazarova aıtty.
Úkimettegi baspasóz konferensıasy barysynda mınıstr bul túzetýler Memleket basshysynyń tapsyrmasy boıynsha ázirlengenin aıtty.
"Shynymen de, búgin osy normalar jobasyn ázirledik. Qazirgi ýaqytta Bas prokýratýra, İshki ister mınıstrligimen jumys júrgizilip jatyr, aldyn ala oń qorytyndylar alyndy", – dedi mınıstr.
"Qylmystyq kodekske jańa 158-1-babyn engizý usynylady. Ol medısına qyzmetkerlerine qatysty kúsh qoldaný nemese kúsh qoldaný qaýpi úshin jazany kózdeıdi".
Atap aıtqanda:
- qaýip rastalǵan jaǵdaıda - 2 jylǵa deıin bostandyqty shekteý;
- kúsh qoldaný - 2 jyldan 7 jylǵa deıin bas bostandyǵynan aıyrý;
- eger qylmys tótenshe jaǵdaı kezinde jasalsa - 10 jylǵa deıin;
- eger shabýyl medısına qyzmetkerleri tobyna baǵyttalǵan jáne toppen jasalsa - 15 jylǵa deıin bas bostandyǵynan aıyrý.
Sonymen qatar, jýrnalıser mınıstrden eńbek jolynyń basynda naýqastar tarapynan agresıaǵa tap bolǵan-bolmaǵanyn surady.
"Men medbıke jáne qabyldaý bóliminiń dárigeri retinde eńbek jolymdy bastadym. Sol kezde, 30 jyldan astam ýaqyt buryn, ondaı jaǵdaılar bolǵan joq. Al qazirgi kezde mundaı jaǵdaılar aı saıyn tirkelip otyr, bul ahýaldyń óte kúrdeli ekenin kórsetedi", - dedi mınıstr.