«Búrkitshi qyz – Aısholpan» derekti fılminiń tusaýkeseri ótti
Osyǵan deıin bul týyndy álemniń 30 elinde kórsetilgen. Premeraǵa fılmniń bas keıipkeri, mońǵolıalyq qazaq qyz, qusbegi Aısholpan da qatysty, dep habarlaıdy Almaty-akshamy.kz Almaty.tv-ǵa silteme jasap.
Ataqty Otto Belldyń rejıserligimen jaryq kórgen, saıatshy qyzdyń ómiri arqaý bolǵan derekti fılm «Oskar» syılyǵyna úmitker 15 týyndynyń kóshin bastap tur.
«2013 jyldan bastap kıno túsirildi, ıaǵnı ol kıno 2,5 jyl túsirildi. Fılmde birinshi ana men qyzdyń tárbıesi jáne de qazaqtyń salt-dástúri, Mońǵolıadaǵy qazaqtardyń turmys-tirshiligi, kúndelikti ómirlik jaǵdaıy baıandalady. 2013 jyldan bastap álemge alǵash ret búrkitshi qyz retinde tanyldym», - dedi búrkitshi Aısholpan Nurǵaıypqyzy.
Osy fılmnen keıin álemge tanylǵan saıatshy qandasymyzǵa sheteldiń beldi joǵary oqý oryndaryna joldamalar da usynylypty. Soǵan qaramastan, búrkitshi qyz atajurtqa oralyp, armandaǵan mamandyǵyna oqýǵa túsken.
«Alǵashynda, árıne, bárimiz tańqaldyq. Sonaý Oksford, Garvard ýnıversıtetteri shaqyrtqan búrkitshi qyz Sýleıman Demırel ýnıversıtetin tańdapty. Sonyń ishinde qazaq tili men ádebıeti mamandyǵyna keledi eken degende, ol qandaı qyz eken, qazaqsha bile me eken, qandaı stýdent bolady eken dep ári kúdik, ári maqtanyshtyń boıymyzda bolǵany ras», - dedi Sýleıman Demırel atyndaǵy ýnıversıtettiń profesory Baıan Kerimbekova.