Buqtyrmada Alkóldegideı týrıserge jaǵdaı jasalmaq
Shyǵys Qazaqstan oblysyndaǵy Buqtyrma sý qoımasynyń jaǵalaýy Alakól úlgisimen damytylady, dep habarlaıdy Almaty-akshamy.kz Inform.kz-ke silteme jasap.
SHQO ákimdiginiń málimetine súıensek, jaz kezinde Buqtyrma sý qoımasynyń jaǵalaýyna jergilikti turǵyndardan bólek, respýblıkanyń túkpir-túkpirinen jurt aǵylady. Aldaǵy ýaqytta bul demalys ornyn birqatar ózgeris kútip tur.
«Buqtyrmaǵa baratyn týrıserge jaıly jaǵdaı jasalýy tıis. Alakóldegi sıaqty munda demalys ornynyń ınfraqurylymyn damytý qajet. Tıisti jumystar bıyl bastalady», - dedi aımaq basshysy Danıal Ahmetov.
Onyń aıtýynsha, demalys bazalaryndaǵy túrli nysandarǵa qoıylatyn talaptar qatańdatylady. Jaısyz, eski ǵımarattardyń ornyna jańalaryn salǵan abzal.
«Máselen, qazir Alakólde týrıserge qolaıly jańa qonaq úı kesheni boı kóterdi. Buqtyrmaǵa da osyndaı ózgeris kerek. Halyqqa munda jetý yńǵaıly bolý úshin Osınov asýyn aınalyp ótetin jol qurylysyn aıaqtaý qajet», - dedi oblys ákimi.